Ndeshje emocionuese, që mbajti të mbërthyer tifozët deri në rënien e sirenës për fundin e lojës, ishte ajo e zhvilluar në Kaliforni mes Los Angeles Lakers dhe Orlando Magic.

Lakers u mundën 119-118 në sekondën e fundit nga Orlando, duke humbur një shans të mirë për të kapur kreun në Perëndim. Franz Wagner me 37 pikë e 11 asist ishte lider për miqtë, duke i bërë të pavlefshme 70 pikët e dyshes Davis-James.

Fiton edhe skuadra e Charlotte, që mundi 123-121 Detroit, në fund të një ndeshje të ekuilibruar. Brandon Miller me 38 pikë ishte shënuesi më i mirë për vendasit, njeriu që i dhuroi fitoren.

Vijon periudha pozitive edhe për San Antonio.Ekipi i Spurs fitoi 126-118 ndaj Utah Jazz, duke ngjitur disi shkallët në renditje. Tetë basketbollistë të Spurs kaluan kuotën e 10 pikëve.

Nuk zhgënjen as Toronto, që në shtëpi fitoi 110-105 ndaj Minnesota, sfidë ku protagonist ishte RJ Barrett me 31 pikë.