GJKKO, me kërkesë të SPAK ka caktuar masat e sigurisë për 21 persona, nga të cilat 18 janë arrest me burg, dy detyrim paraqitje dhe 1 arrest në shtëpi.
Gazetarja e News24, Klodiana Lala, bëri të ditur se masat e sigurisë janë caktuar në kuadër të hetimit për një organizatë kriminale me shtrirje ndërkombëtare.
Mes masave të arrestit është edhe ajo për ish-zyrtarin e policisë, Dedan Gjoni ish-shef i komisariatit nr.6 në Tiranë, i arrestuar më parë në kuadër të një tjetër operacioni nga SPAK. Ish-gjyqtarja e Elbasanit, Pajtime Fetahu është arrestuar gjithashtu, pasi më herët ndaj saj ishte dhënë masa “arrest në shtëpi”. Arrest shtëpie është dhënë ndërkohë për avokaten e grupit të Suel Çelës, Blerina Beqiri.
Njoftimi zyrtar i SPAK: Me kërkesë të Prokurorisë se Posaçme, Gjykata e Posaçme e Shkallës së Parë për Korrupsionin dhe Krimin e Organizuar ka caktuar masat e sigurisë për 21 persona, ku përfshihen anëtarët e organizatës kriminale, një zyrtar i lartë policie, një gjyqtar në detyre gjatë kryerjes së aktivitetit kriminal, një avokat dhe dy gazetarë.
Operacioni për ekzekutimin e masave të sigurisë, i cili po mbështetet nga Europol dhe agjencitë e tjera ligjzbatuese shqiptare dhe evropiane, është në vijim.
Masat e caktuara të sigurisë janë si më poshtë:
Arrest me burg – 18 persona (përfshirë ish gjyqtarin dhe zyrtarin e lartë të policisë së shtetit);
Arrest në shtëpi – 1 avokat;
Detyrim paraqitje në policinë gjyqësore – 2 gazetarë.
(BalkanWeb)
