Lirohet kreu i PD-së Sali Berisha. Gazetarja Klodiana Lala raportoi për “BalkanWeb” se Gjykata e Posaçme ka dhënë vendimin për heqjen e masës së arrestit shtëpiak për Berishën.
Revokimi i masës është bërë nga gjyqtarja Flojera Davidhi. Sali Berisha u vendos në arrest shtëpie më 30 dhjetor të vitit të kaluar, pasi SPAK ngriti ndaj tij akuzën për korrupsion pasiv në bashkëpunim për privatizimin e ish-kompleksit Partizani.
Ishte gjyqtarja Irena Gjoka që vendosi arrest shtëpiak ndaj ish-kryeministrit Berisha, pasi ishte dhënë më herët masa e detyrimit të paraqitjes, teksa kjo masë nuk ishte respektuar nga kreu i PD.
Gazetarja Lala raportoi se Prokuroria ka të drejtë të apelojë vendimin e gjyqtares Davidhi apo do vijojë shqyrtimi i çështjes nga GJKKO.
Ndaj z. Berisha është ngritur akuza e korrupsionit pasiv në bashkëpunim me dhëndrin e tij Jamarbër Malltezi. Prokuroria i ka dorëzuar të gjithë fashikujt dhe Gjykata po shqyrton nëse është e plotë dhe do të vendosë nëse do të nisë gjykimin, do kërkojë kthimin për plotësim të mëtejshëm.
Gjykata Kushtetuese përshpejtoi kërkesën për shqyrtimin e kërkesës së Berishës për shfuqizimin e arrestit të shtëpisë më 27 dhjetor dhe nga ana tjetër dhe Gjykata e Strasburgut përshpejtoi shqyrtimin e çështjes së ish-kryeministrit.
Reagon SPAK
Prokuroria e Posaçme Antikorrupsion në një reagim për News24 deklaroi se vendimi që i GJKKO që liroi Berishën do të apelohet.
“Pasi Prokuroria e Posaçme të njihet me vendimin e zbardhur të Gjykatës së Posaçme të Shkallës së Parë kundër Korrupsionit dhe Krimit të Organizuar do të vijojë procedurën e ankimimit në Gjykatën e Posaçme të Apelit. Ndërkohë seanca paraprake për gjykimin në themel të çështjes vazhdon në Gjykatën e Posaçme të Shkallës së Parë për Korrupsionin dhe Krimin e Organizuar”, thuhet në reagimin e SPAK.
(BalkanWeb)
