Presidenti i Koresë së Jugut shpalli gjendjen e jashtëzakonshme ushtarake në një fjalim të papritur televiziv, duke akuzuar opozitën politike se është në anën e Koresë së Veriut.

Presidenti Yoon Suk Yeol tha se masa kishte “qëllim për të zhdukur forcat pro-koreane dhe për të mbrojtur rendin kushtetues të lirisë”, sipas mediave koreano-jugore.

Ai nuk ka specifikuar se çfarë masash do të ndërmerren.

Deklarata erdhi pas javësh bllokimi politik mbi një projekt-ligj buxhetor, me Partinë Demokratike rivale, e cila mban shumicën në parlamentin e vendit, duke refuzuar të japë dritën jeshile të legjislacionit.

Gjendja e jashtëzakonshme ushtarake e shpallur nga Presidenti u pasua me kundërshtimet e menjëhershme të politikanëve, përfshirë liderin e partisë konservatore, Han Dong-hoon, i cili e quajti vendimin “të gabuar” dhe u zotua “ta ndalojë atë”.

Udhëheqësi i opozitës Lee Jae-myung, i cili humbi ngushtë nga Yoon në zgjedhjet presidenciale të 2022, e quajti njoftimin e Yoon “të paligjshëm dhe antikushtetues”.

Agjencia e Lajmeve Yonhap raportoi se anëtarëve të Asamblesë Kombëtare u është ndaluar hyrja në godinën e Parlamentit, me ushtrinë e Koresë së Jugut që thuhet se ka njoftuar pezullimin e të gjitha aktiviteteve parlamentare.

Kryetari i Parlamentit raportohet se ka një plan për të thirrur një seancë, sipas transmetuesit lokal YTN TV.

Opozita kryesore e Koresë së Jugut, Partia Demokratike, e cila ka shumicën në parlament, u ka bërë thirrje të gjithë ligjvënësve të mblidhen në Asamblenë Kombëtare, pavarësisht se hyrja në parlament është bllokuar nga ushtria.

Pas shpalljes së ligjit ushtarak, ushtria e Koresë së Jugut shpalli se parlamenti dhe tubimet e tjera politike që mund të shkaktojnë “konfuzion social” do të pezullohen, sipas agjencisë së lajmeve Yonhap, e cila po raporton se njerëzit që shkelin ligjin ushtarak mund të arrestohen pa urdhër.

Ushtria tha gjithashtu se mjekët, që kanë nisur grevën, duhet të kthehen në punë brenda 48 orëve. Mijëra mjekë kanë qenë në grevë prej muajsh mbi planet e qeverisë për të rritur numrin e studentëve në shkollat ​​e mjekësisë.

Tanke, automjete të blinduara dhe ushtarë me armë do të kontrollojnë vendin. Herën e fundit që ligji ushtarak u shpall në Korenë e Jugut ishte në vitin 1979, pas vrasjes së diktatorit të atëhershëm të Koresë së Jugut Park Chung-hee, i cili kishte marrë pushtetin në një grusht shteti ushtarak në vitin 1961.