Sllovakia do të vazhdojë të eksportojë produkte nafte të prodhuara nga nafta ruse në Çeki edhe për gjashtë muaj të tjerë pasi qeveria e vendit negocioi një zgjatje të përjashtimit ekzistues nga sanksionet e BE-së.
“Negocimi i një përjashtimi për eksportet e produkteve nga nafta ruse në Çeki është një sukses i rëndësishëm jo vetëm nga perspektiva e tregut të brendshëm, por edhe për çmimet e qëndrueshme në rajon,” tha ministrja e Ekonomisë e Sllovakisë Denisa Saková.
Pas skadimit të përjashtimit, rafineria e naftës e Sllovakisë, Slovnaft, pjesë e MOL hungareze, do të jetë në gjendje të furnizojë produkte nga nafta e papërpunuar ruse vetëm në tregjet e brendshme dhe të Ukrainës. Slovnaft eksporton produkte nafte të prodhuara kryesisht nga nafta e papërpunuar që rrjedh në vend përmes tubacionit rus të naftës Druzhba.
Kryeministri çek Petr Fiala deklaroi se “Sllovakia kërkoi zgjatjen e përjashtimit. Ne nuk e kundërshtuam një kërkesë të tillë; është për gjysmë viti.”
“Republika Çeke nuk ka nevojë për këtë përjashtim për konsumin e saj,” tha kreu i departamentit të energjisë në Ministrinë çeke të Industrisë dhe Tregtisë René Neděla .
“Gjatë takimit, ne e kemi deklaruar këtë disa herë,” vazhdoi Neděla, duke thënë se “kolegët nga Sllovakia theksuan ndihmën për Ukrainën dhe stabilizimin e furnizimeve të produkteve të papërpunuara në Evropën Qendrore për nevojën e zgjatjes së përjashtimit”.
Ai shtoi se Hungaria e mbështeti kërkesën sllovake. Si Hungaria ashtu edhe Sllovakia kanë kritikuar sanksionet ndaj Rusisë dhe kanë bërë shumë më pak se Çekia për të reduktuar varësinë e tyre nga furnizimet ruse të energjisë.
Në fillim të këtij muaji, Çekia nuk u ndikua nga ndalimi dy-ditor i rrjedhës së naftës Druzhba në vend.
Qeveria çeke e qendrës së djathtë pret që vendi të çlirohet nga varësia nga importet ruse të naftës deri në mes të vitit të ardhshëm, pas përfundimit të projekteve TAL-PLUS – një zgjerim 1.6 miliardë CZK (67.5 milionë euro) i tubacionit TAL e cila shkon nga qyteti port italian i Triestes në veri deri në Austri dhe Gjermani, ku Çekia është e lidhur me të me tubacionin e saj IKL.
TAL-PLUS do të rrisë kapacitetin transportues të tubacionit për Çekinë në 4 milionë ton në vit (tpy) naftë, gjë që do t’i mundësojë vendit të ndalojë importin e naftës nga tubacioni Druzhba.
Orlen i Polonisë operon dy rafineri në Çeki në Litvínov, pranë kufirit gjerman në veri, dhe Kralupy nad Vltavou, afër Pragës. Në gusht, kreu i Orlenit, Ireneusz Fafara i tha agjencisë polake të shtypit PAP se Orlen është gati t’i japë fund plotësisht importeve të naftës ruse, në pritje të përfundimit të përmirësimit të lidhjeve të tubacioneve të naftës nga Gjermania në Çeki.
(A.A/BalkanWeb)
