Real Madrid përfiton më së miri nga ndalesa e Barcelonës të shtunën ndaj Atleticos duke fiton 4-2 ndaj Sevillas në “Bernabeu” dhe parakaluar katalanasit në renditje. Një sukses i merituar i ekipit të Ançelotit, që e zgjidhi shumë shpejtë sfidën, falë tre golave të Mbappe, Valverde dhe Rodrigo, të cilët pas 34 minutash lojë fiksuan shifrat në 3-0. Romero ngushtoi diferencën për miqtë 10 minuta nga fundi i pjesës së parë, por “Los Blancos” mbyllën praktikisht gjithçka me rifillimin e lojës falë golit të Diaz. Goli i Lukebakios në fund të ndeshjes, shërbeu sa për statistikë.

Falë kësaj fitorje të besuarit e Ançelotit, ngjiten në vendin e dytë në renditje, në kuotën e 40 pikëve, një më pak se sa kryesuesit e Atleticos që kryesojnë La Ligën dhe lejnë pas Barcelonën, me skuadrën e Hansi Flick që ndodhet pas javës së 18, në vendin e 3 me 38 pikë, duke patur edhe 1 ndeshje më shumë se sa dy skuadrat madrilene.

Dy mediat spanjolle pranë klubit katalanas, vejnë theksin tek momenti negativ që skuadra e Hansi Flick po kalon: “Në rënie të lirë” dhe “Flick nën presion”, janë dy titujt kryesorë të këtyre të përditshmeve. 1 fitore në 7 ndeshjet e fundit në La Liga dhe humbja e tretë radhazi në shtëpi, janë shifra të një skuadre jo për titullin kampion.

Flick u shpreh i kënaquyr me lojën, që djemtë e tij zhvilluan ndaj Atleticos, por pavarësisht optimizmit të gjermanit, në Barcelonë prej javësh “këmbanat e alarmit” janë duke rënë. Nëse edhe me fillimin e vitit të ri, situata nuk do të ndryshojë tek blaugranat, atëherë ata mund t’i thonë lamtumirë garës për titull shumë shpejtë këtë sezon.