Blake Lively ka paraqitur një ankesë ligjore kundër kolegut të saj në “It Ends With Us”, Justin Baldoni, duke e akuzuar atë për ngacmim seksual dhe orkestrimin e një fushate për të dëmtuar reputacionin e saj. Akuzat burojnë nga një takim në janar, ku Lively u përball me atë që ajo e përshkroi si një “mjedis pune armiqësor” që përfshin Baldoni-n dhe CEO-n e Wayfarer Studios, Jamey Heath.
Ankesa e Lively-t liston kërkesat për të ndaluar sjelljen e papërshtatshme, duke përfshirë komentet për “varësinë e tij ndaj pornografisë” në të kaluarën, përmendjet e padëshiruara të organeve gjenitale dhe ndryshimet e paautorizuara në përmbajtjen seksuale të filmit. Ajo gjithashtu tha se Baldoni pretendonte se ai mund të komunikonte me babanë e saj të ndjerë.
Ekipi ligjor i Baldonit i ka mohuar akuzat, duke i quajtur ato “kategorisht të rreme” dhe duke pretenduar se Lively ka bërë kërcënime për të prishur filmin. Aktorja u kundërpërgjigj, duke thënë se veprimi i saj ligjor synon të ekspozojë taktikat hakmarrëse dhe të mbrojë të tjerët.
“It Ends With Us”, një film për dhunën në familje i bazuar në romanin e Colleen Hoover, pati shumë sukses në arkëtime, pavarësisht polemikave mbi portretizimin e abuzimit. Spekulimet për tensionin mes Lively-t dhe Baldoni-t u shtuan pasi ata shmangën paraqitjen së bashku nëpër evente promovuese.
