Abdyl Sinani, dekan i Teknologjisë Ushqimore në Kolegjin Universitar Qirjazi, i ftuar në “Koha për t’u zgjuar” në News24, ka folur në lidhjen me sigurinë ushqimore dhe ka dhënë informacione për t’u ardhur në ndihmë qytetarëve për ruajtjen më të gjatë të produkteve ushqimore në prag të fundvitit.
Ai ka treguar se mishi mund të ruhet për disa muaj nëse vendoset në ngrirje në temperaturën -17 gradë celcius.
“Të gjitha ushqimet blegtorale dhe bujqësore kanë jetën e tyre biologjike, oksigjeni godet proteinat dhe karbohidratet.
Marrim një shembull, lopa u ther, për 2-3 ditë goditet nga oksigjeni, por nëse kjo vijon, vjen prishja.
Nëse lopa e therur pas 2 ditësh nuk futet në 4 gradë, nis një frymëmarrje më e thellë, që pret yndyrnat dhe prish proteinat.
Nëse marrim mishin e viçit apo gjelin e detit, që është i sezonit, duhet të futet në 4-5 gradë në frigorifer. Nëse do të mbahet dhe të ruhet për 6-7 muaj duhet të futet në minus 17 gradë në ngrirje.
Sa i përket frutave dhe ruajtjes së tyre, mollët, dardhat, mandarinat, duhen të vendosen në një ambient në temperaturën 20 gradë dhe lagështia e ajrit 80-85 përqind, për t’u rritur jetëgjatësinë”, tha ai.
Eksperti Sinani ka treguar edhe sekretin e ruajtjes së vlerave ushqimore të gatuara, si mishi dhe orizi. Sipas tij, ringrohja e këtyre produkteve duhet të bëhet në temperaturë të ulët, ose ndryshe prishen vlerat dhe nis prodhimi i aminoacideve.
“Orizi i gatuar nuk duhet ringrohur më shumë se 30 gradë, sepse proteinat e zbërthyera shkatërrohen dhe kthehen në aminoacide, amina që janë toksike, njëjtë edhe për mishin e gatuar”, tha ai.
(BalkanWeb)
