Në Madrid e prisnin prej kohësh, madje joshja që i bëri prej vitesh presidenti Perez solli një përplasje të ashpër me presidentin e PSG, Al Kelaifi. Ndryshe nga se pritej, kalimi i Mbappe në Madrid nuk po jep efektet që tifozët prisnin pasi sulmuesi francez ka përfunduar shpesh në qendër të kritikave.
Ndryshe nga perceptimi i krijuar, AS, e përditshmja spanjolle vjen me shifra dhe fakte duke vërtetuar se sezoni i parë i Mbappe në Madrid, deri në këtë pikë, nuk është aq keq sa tifozët mendojnë, madje në shifra Mbappe ka bërë më mirë edhe se sa C.Ronaldo në sezonin e parë të portugezit në Madrid.
Pauza e gjen Mbappe me 14 gola të shënuar me fanellën e Real Madrid, një më shumë se sa Ronaldo në të njëjtën kohë. Mbappe ka gjetur rrugën e rrjetës në katër ndeshjet e fundit duke bërë që Real Madrid të parakalojë Barcelonën dhe të jenë vetëm një pikë larg Atletiko Madrid.
(BalkanWeb)
