Në një postim të fundit në Truth Social, presidenti i sapozgjedhur i SHBA-së, Donald Trump deklaroi synimin e tij për të kërkuar dënime me vdekje për vrasësit brutalë dhe përdhunuesit, në mënyrë që të mbronte familjet amerikane nga kriminelë të tillë.

Trump shkroi se menjëherë pas inaugurimit të tij, ai do të udhëzojë Departamentin e Drejtësisë që të ndjekë në mënyrë agresive dënimet me vdekje për të mbrojtur familjet amerikane nga përdhunuesit e egër, vrasësit dhe përbindëshat për t’i bërë Shtetet e Bashkuara përsëri “një vend të ligjit dhe rendit”.

Ky njoftim vjen pas raportimeve se presidenti Joe Biden ka ndryshuar dënimet me vdekje të 37 nga 40 individë që presin ekzekutimin në burgim të përjetshëm pa mundësinë e lirimit. Në janar, Biden shprehu gjithashtu mbështetjen për një moratorium mbi ekzekutimet federale.

(A.A/BalkanWeb)