Presidenti ukrainas Volodymyr Zelenskiy tha të hënën se Rusia kishte pësuar humbje të mëdha në pesë muaj luftime me forcat ukrainase në rajonin Kursk të Rusisë jugore, me afro 15,000 të vrarë.
“Gjatë operacionit Kursk, armiku ka humbur tashmë 38,000 ushtarë të tyre vetëm në këtë drejtim, me afro 15,000 nga këto humbje që janë të pakthyeshme”, tha Zelenskiy në fjalimin e tij.
Zelenskiy, në komentet e tij, nuk ofroi asnjë provë për shifrat që ai citoi për humbjet ruse. Ukraina nisi një inkursion masiv në rajonin e Kurskut në gusht dhe ka pushtuar pjesë të territorit, megjithëse ushtria ruse ka thënë se ka rimarrë pjesën më të madhe të saj. Ukraina tha se nisi një ofensivë të re në rajon të dielën, por ka dhënë pak detaje.
Vlerësimet ukrainase dhe perëndimore thonë se rreth 11,000 trupa të Koresë së Veriut po luftojnë përkrah forcave ruse në rajon. Rusia as e ka konfirmuar e as mohuar praninë e tyre.
Ministria ruse e mbrojtjes tha të hënën se përparimi ukrainas ishte dështuar dhe forca kryesore ishte shkatërruar pranë vendbanimit Berdin, afër një rruge që shkon në verilindje drejt qytetit të Kursk. Ministria tha se forcat ruse kishin arritur përfitime të rëndësishme në Ukrainën lindore, duke përfshirë pushtimin e qytetit të Kurakhove.
Zelenskiy nuk e përmendi Kurakhove në komentet e tij. Ai tha se forcat e Ukrainës kishin krijuar një zonë në rajonin e Kurskut, ku Rusia kishte transferuar njësi të forta ushtarake dhe kjo e kishte penguar Moskën që t’i vendoste ato forca në zonat kryesore të vijës së frontit në Ukrainën lindore.
“E rëndësishmja, pushtuesit nuk mund ta drejtojnë tani të gjithë këtë forcë në drejtimet tona të tjera, veçanërisht në rajonin e Donetsk, Sumy, rajonin e Kharkiv ose Zaporizhzhia,” tha ai.
