Prokuroria e Posaçme kundër Korrupsionit dhe Krimit të Organizuar (SPAK) ka identifikuar pjesëtarë të tjerë të një grupi të strukturuar kriminal, të përfshirë në trafikun ndërkombëtar të lëndëve narkotike, që vepronte në Itali.
Grupi kriminal, i goditur më 5 nëntor 2024 gjatë një operacioni të përbashkët mes SPAK dhe Prokurorisë së Firences, shërbente si furnizues kryesor i tregjeve italiane me drogë, e cila transportohej me kontejnerë nga Amerika Latine në portet italiane të Livornos, Genovas dhe Savonas.
Hetimet e zhvilluara në Shqipëri kanë zbuluar përfshirjen e shtetasit K.B., i cili deri tani nuk ishte identifikuar nga autoritetet italiane. K.B. organizonte pritjen, magazinimin dhe shpërndarjen e drogës në tregun italian.
Një rast konkret përfshin sekuestrimin e një sasie prej 10.522 kilogramësh kokainë, të fshehur në një automjet të tipit Ford Fiesta, më 27 janar 2021 në Autostradën Guardamiglio (LO), Itali. Në këtë operacion u arrestuan shtetasit shqiptarë E.K. dhe M.K. Komunikimet mes K.B. dhe pjesëtarëve të tjerë të grupit të arrestuar në Itali kanë provuar rolin e tij organizativ në këtë rrjet kriminal.
Më 12 janar 2024, SPAK ka ekzekutuar masën e sigurisë të vendosur nga Gjykata e Posaçme e Shkallës së Parë për shtetasit M.N. dhe J.K., të arrestuar më parë pas urdhër-arresteve të lëshuara nga autoritetet italiane. Këta shtetas po hetoheshin në kuadër të procedimit penal nr. 296 të vitit 2021.
Njoftimi i SPAK:
Prokuroria e Posaçme kundër Korrupsionit dhe Krimit të Organizuar ka bërë të mundur identifikimin e personave të tjerë të përfshirë në veprimtarinë e paligjshme të trafikimit të lëndëve narkotike të kryera nga grupi kriminal, i goditur më datë 05.11.2024*, në operacionin e përbashkët me Prokurorinë e Firencës, Itali.
Grupi i strukturuar kriminal shërbente si furnizues me shumicë i drogës në tregjet italiane, sasi që vinte me kontejnerë nga Amerika Latine në portet italiane (Livorno, Genova dhe Savona). Ky grup kryente veprimtarinë e nxjerrjes së drogës dhe shpërndarjes së saj, ndërsa ekipet e posaçme kujdeseshin për rikuperimin e lëndës narkotike, nxjerrjen e dërgesave nga zonat portuale si dhe për t’ia vënë në dispozicion grupeve kriminale.
Nga veprimtaria hetimore e kryer në Shqipëri, është bërë identifikimi i shtetasit, K.B, anëtar i grupit të struktuar kriminal, i paidentifikuar nga autoritetet italiane, i cili merrej me organizimin e pritjes, magazinimin e drogës në Itali dhe më pas shpërndarjen në tregun italian.
Konkretisht, ai është organizatori i furnizimit të lëndës narkotike, e sekuestruar më 27 janar 2021 në Autostradën Guardamiglio (LO), Itali, ku janë arrestuar shtetasit shqiptare;E.K. dhe M.K., të cilëve iu gjet një sasi e lëndës narkotike të llojit kokainë, me një peshë totale bruto prej 10.522 kg, e paketuar në 9 pako plastmasi të fshehura në një hapësirë të një mjeti, Ford Fiesta. Përveç këtij sekuestrimi, ekzistojnë elementë të shumtë të komunikimeve të të arrestuarit K.B, me pjesëtarët e grupit të strukturuar kriminal, (tashmë të arrestuar në Itali), duke provuar rolin e tij brenda grupit të strukturuar kriminal.
Gjithashtu, në datë 12.01.2024, është ekzekutuar dhe vendimi për caktimin e masës së sigurimit të dhënë nga Gjykata e Posaçme e Shkallës së Parë për shtetasit; M.N dhe J.K, të arrestuar më parë, pas urdhrit të kërkimit i nxjerrë nga autoritetet gjyqësore italiane, por për të po kryheshin hetime nga Prokuroria e Posaçme në kuadër të procedimit penal nr.296 të vitit 2021.
Prokuroria e Posaçme kundër Korrupsionit dhe Krimit të Organizuar falenderon për bashkëpunimin Drejtorinë e Përgjithshme të Policisë së Shtetit për profesionalizimin e treguar gjatë kryerjes së hetimeve dhe fazës së ekzekutimit të masës së sigurimit
Procedimi penal është ende në fazën e hetimeve paraprake dhe për shkak të parimit të pafajësisë, përgjegjësia e personave nën hetim do të konstatohet përfundimisht vetëm në rast të një dënimi të formës së prerë.
