Bujar Nasufi, 56 vjeç, u ekzekutua mbrëmjen e sotme në rrugën “Myrte Zeneli” në Tiranë, pranë “Pallatit me Shigjeta”. Ai u qëllua me 6 plumba teksa ndodhej pranë banesës së tij dhe për pasojë humbi jetën rrugës për te Spitali i Traumës. Po 6 gëzhoja ka gjetur edhe grupi hetimor në vendin e ngjarjes.
56-vjeçari pronar i një mobilerie u ekzekutua brenda në automjetin e tij “Mercedes Benz” i cili duket në pamjet që sjell BalkanWeb dhe News24 kur merret nga karrotreci i policisë.
Mësohet se autori i ngjarjes lëvizte me një motor dhe pas krimit është larguar në drejtim të Saukut. Policia ka sekuestruar kamerat e sigurisë të zonës përreth.
Tiranë/Informacion paraprak
Më datë 12.01.2025, rreth orës 20:40, tek “Pallati me Shigjeta” në rrugën “Myrte Zeneli”, është qëlluar me armë zjarri në drejtim të një automjeti me drejtues shtetasin B.N, rreth 56 vjeç, i cili si pasojë ka humbur jetën.
Një grup i posaçëm hetimor, nën drejtimin e Prokurorisë, ndodhet në vendngjarje dhe vazhdon punën për sqarimin e rrethanave të ngjarjes, identifikimin dhe kapjen e autorit/ëve të dyshuar.
Shërbimet e Policisë kanë ngritur pika kontrolli dhe po ushtrojnë kontrolle në zonë për kapjen e autorit.
Informacion më të detajuar mbi këtë ngjarje do të japim në vijim pas veprimeve hetimore paraprake.
(BalkanWeb)
