SHKODËR

Fatos Verracaku që u ekzekutua sot pak para mesditës në Shkodër ishte kushëri me Arjan Verracakun, 31-vjeçarin e vrarë më 1 shtator po në Shkodër, ndërsa kalëronte.

Arjan Verracaku, pronar i dy bizneseve në Velipojë dhe baba i dy fëmijëve u gjet i vrarë në periferi të qytetit të Shkodrës ku zakonisht janë gjetur makina të përdorura për krime dhe të djegura.

Fillimisht një makinë e braktisur ka ngjallur dyshimet e policisë së Shkodrës dhe pas saj është zbuluar dhe viktima. Sipas ekspertizës paraprake, 31-vjeçari ishte vrarë gjatë natës.

Ndërsa sot Fatos Verracaku ishte duke pirë kafe në një lokal në zonën e Markatës në lagjen “Rus” në Shkodër bashkë me mikun e tij Fatmir Mehaj kur u qëllua nga persona me maska dhe me motor. Ai ndërroi jetë në spital për shkak të plagëve të marra, ndërsa miku i tij është jashtë rrezikut për jetën. Sipas qytetarëve, Verracaku ishte tregtar peshku në markatë. Ai kishte lidhje familjare me Fatmir Mehajn pasi ishin dhëndërr e kunat.

(m.k/BalkanWeb)