Me gjithë përpjekjet e forta të diplomacisë shqiptare dhe aleatët më të ngushtë të Kosovës, për t’i siguruar asaj një vend në UNESCO, rezultati i lobimit ishte dështimi.


Kryediplomati i Shqipërisë, Ditmir Bushati, e ka cilësuar votimin si zhgënjyes. Ministri i Jashtëm ishte prezantuesi i kërkesës për anëtarësimin e Kosovës në UNESCO, pas vendimit të tetorit nga
Këshilli Ekzekutiv i kësaj organizate për të lejuar votimin mbi anëtarësimin e Kosovës.


Lobimi ka qenë i fortë nga pala shqiptare dhe ajo serbe, dhe paralelisht nga aleatët përkatës. Në Paris të shtunën ka pasur replika mes ministres sonë të Kulturës, Mirela Kumbaro, dhe ministrit të Jashtëm rus, Sergei Lavrov, mbi anëtarësimin e Kosovës në UNESCO. Me gjithë frymën pozitive gjatë periudhës së gjatë të lobimit, diplomatët shqiptarë e kanë pranuar se rezultati ishte shumë i paparashikueshëm. Javën e parë të tetorit të këtij viti, ministri i Jashtëm shqiptar, Ditmir Bushati, zhvilloi një vizitë në Marok, për të lobuar për anëtarësimin e Kosovës në UNESCO, si dhe urat e bashkëpunimit mes dy vendeve. Por ky lobim nuk rezultoi me sukses.


Maroku ishte mes vendeve që votuan kundër anëtarësimit të Kosovës në UNESCO. I shënjestruar për dështimin, ministri Bushati ka thënë se rezultati ishte zhgënjyes, por ai nuk pranoi ta quante atë një dështim. Bushati u nis optimist për në Paris dhe të dielën ka postuar në faqen e tij në “Twitter”: “Rrotat drejt Parisit për të marrë pjesë në konferencën e përgjithshme të UNESCO­s. Nesër dita vendimtare për Kosovën në UNESCO”. Por të hënën atmosfera ishte krejt tjetër.

“Unë di që në vendin tonë është kthyer në praktikë dhe modë që kur ka fitore, askush nuk penalizon fitoren dhe relativisht kur nuk ka rezultate që dëshirohen, gjithmonë ka një ngut për të shigjetuar dhe gjetur përgjegjësit. Por mund të them që është rezultat zhgënjyes, për shkak se për tri vota Kosova nuk arriti të bëhej anëtare e UNESCO­s. Por ky është një votim që konsolidon aleancën strategjike të shqiptarëve me Perëndimin. Ky është një votim që mendoj se do ta vendosë në pozitë më të menduar edhe vetë BE-­në për të qenë më kushtëzues ndaj Serbisë, dhe për të qenë më efikas në partneritete
reale në rajonin tonë për të evituar në çdo rrethanë kthimin e rajonit tonë në një zonë të influencave të ndryshme”, tha Bushati në një lidhje telefonike me “Top Channel”.

Ai e cilësoi rezultatin si një pasqyrë e rrethanave dhe përplasjeve gjeopolitike, që janë të pranishme edhe në Ballkan. Votimin kundër nga disa vende që e kanë mbështetur pavarësinë e Kosovës, Bushati e
cilësoi surprizues.

(ma.ar/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: