Rrjeti i komunikimit i Hezbollahut mund të jetë komprometuar nga sulmet e fundit të biperave dhe radiove, thanë ekspertët.
Biperat e përdorura nga anëtarët e Hezbollahut shpërthyen në Liban dhe Siri të martën, duke vrarë të paktën 12 persona, duke përfshirë dy fëmijë të vegjël, përpara se të mërkurën të ndodhnin shpërthime të tjera, duke vrarë të paktën 20 njerëz dhe duke plagosur mijëra të tjerë.
Hezbollahu beson se të dy sulmet janë kryer nga Izraeli, i cili ende nuk ka bërë ndonjë koment zyrtar. Por dyshohet se Izraeli është infiltruar në zinxhirin e furnizimit të pajisjeve.
Por, ndërkohë që Hezbollahu do të lëkundet nga humbja e luftëtarëve, “ndikimi psikologjik” i përgjimit do të jetë “masiv”, tha analisti i sigurisë kombëtare dhe ushtarak, John Spencer.
Veterani dhe drejtuesi aktual i studimeve të luftës urbane në Institutin e Luftës Moderne në West Point tha për Newsweek se “ka gjithmonë një mënyrë për të dëgjuar diçka elektronike. Kjo është rëndësia e operacionit”.
“Hezbollahu do të ketë humbur besimin në të gjitha pajisjet e tyre – ‘A do të shpërthejë? A po dëgjon Izraeli?’ Ndikimi psikologjik është masiv, veçanërisht pasi nuk ishin vetëm pajisja, ata padyshim që dërguan një mesazh”, vijoi ai.
Beni Sabti, një studiues në programin e Iranit në Institutin për Studimet e Sigurisë Kombëtare, tha se ai beson se përgjimi i komunikimeve dhe mbledhja e informacionit do të ketë qenë “qëllimi i parë” i operacionit.
“Ne supozojmë se ai që mund të vendosë eksploziv në këto lloj pajisje mund t’i gjurmojë, t’i dëgjojë, t’i lexojë dhe çdo manipulim tjetër. Sepse qëllimi i parë i këtij lloji të pajisjeve nuk është vetëm shpërthimi i tyre. Para së gjithash, është mbledhja e njohurive, mbledhja e informacionit”, tha Sabti.
Ai shtoi se beson se Izraeli do t’i ketë përdorur pajisjet për të “ndjekur dhe gjurmuar” Hezbollahun përpara se të niste shpërthimet.
Në mënyrë të ngjashme, Khaled Elgindy, i cili drejton Programin e Institutit të Lindjes së Mesme për Palestinën dhe Çështjet izraelito-palestineze, i tha Newsweek se “Hezbollahu është padyshim i shqetësuar nëse ata tashmë janë infiltruar në mënyrë kaq efektive në biperat, radio-toki dhe rrjetet e telefonave celularë – çfarë gjëra të tjera kanë hakuar izraelitët në rrjetin e tyre të sigurisë dhe rrjetin e tyre të komunikimit?
“Kjo krijon të gjitha llojet e frikës dhe pasigurisë brenda organizatës. Ky është një problem strategjik sepse ata tani janë të shqetësuar se nuk e dinë se cilit sistem t’i besojnë dhe sigurisht është diçka shumë, shumë shpërqendruese për ta”, tha ai.
