Ai mund të jetë nën mbrojtjen e regjimit të Putinit, megjithatë, sipas burimeve të kanalit rus General SVR, presidenti i rrëzuar i Sirisë, Bashar al-Assad, ka shpëtuar për mrekulli, pasi vetëm 24 orë më parë, ai u helmua.
Atentati ndaj tij ndodhi të dielën, siç raportohet nga kanali General SVR, i cili dyshohet se drejtohet nga një ish-spiun i lartë rus.
Ish-presidenti sirian pati probleme me frymëmarrjen dhe mjekët që nxituan në banesën e tij në Moskë, ku ai ishte strehuar me familjen, arritën ta shpëtonin.
Lajmi për atentatin e dështuar ndaj tij del në dritë në një kohë kur po qarkullojnë zëra se bashkëshortja e tij Asma Asad kërkon divorcin, duke shprehur dëshirën për t’u zhvendosur në Londër. Dihet se Bashar al-Assad është nën mbrojtjen e të fortit të Kremlinit në Moskë nga 8 dhjetori 2024.
Kanali Telegram General SVR shton gjithashtu se 59-vjeçari Assad thuhet se kërkoi kujdes të menjëhershëm mjekësor pasi, brenda pak sekondash, ai filloi të “kollitej vazhdimisht dhe të ndjehej sikur po mbytej”.
Burimi i cituar nga gjenerali rus SVR konsideron se “ka të gjitha arsyet për të besuar se është bërë një atentat ndaj liderit të rrëzuar të Sirisë”.
Assad u trajtua në banesën e tij dhe gjendja e tij u stabilizua të hënën, sipas kanalit rus.
