TIRANË

Prokuroria e Tiranës ka nisur verifikimin në lidhje me akuzat e Partisë Demokratike bërë ndaj nënkryetarit të Bashkisë,  Arbjan Maznikut, ministres së Drejtësisë, Etilda Gjonaj si dhe për ish-ministrin e Bujqësisë, Niko Peleshi.

Partia Demokratike pretendon se Mazniku dhe Gjonaj kanë shpenzuar shuma të larta për akomodimin e tyre në vizitat e kryera jashtë vendit, ndërsa Peleshi dyshohet se ka futur një pesticid të dëmshëm në kohën kur ushtronte postin e ministrit të  Bujqësisë.

Pas publikimit të disa faturave në media, ministrja e Drejtësisë, Etilda Gjonaj u shpreh se fatura 700 euro e publikuar në media nuk ishte vetëm për të, por për të gjithë stafin dhe se janë shpenzime për dy net fjetjeje. Ajo theksoi në reagimin e saj se është e hapur ndaj çdo ankese të publikut dhe e vendosur për t’iu shërbyer qytetarëve.

Gjithashtu e njëjta gjë thuhet edhe për nënkryetarin e Bashkisë së Tiranës, Arbjan Mazniku, që sipas PD, ka shpenzuar për një natë shumën prej 900 eurove dhe kjo është paguar nga një biznesmen, i cili ushtron aktivitet në fushën e ndërtimit.

(n.m/BalkanWeb)