Kryetari i Bashkisë së Vorës Agim Kajmaku, ka reaguar pasi Partia Demokratike ka akuzuar se ai ishte dënuar në Greqi për falsifikim të monedhave.
Kajmaku, me anë të një postimi në “Facebook” shkruan se iu qëndron fjalëve që ka thënë më herët, se nuk ka qenë ndonjëherë i dënuar. Ai shprehet se nuk ka kryer krime ndonjëherë dhe se ka qenë në Greqi për të punuar, si punëtor dhe familjar.
Kreu i Bashkisë Vorë shton se PD është kthyer si një limon i shtrydhur, që nuk i duhet asnjeriu.
Postimi i Agim Kajmakut:
Që pas marrjes së detyrës si kryetar i Bashkisë së Vorës, ata s’u përballen nga frika e humbjes së padiskutueshme, më janë vërsulur me tërbim! Por unë siguroj me bindje, në radhë të parë qytetarët e Vorës se i qëndroj pikë për pikë asaj që kam deklaruar edhe më herët lidhur për këtë sulm.
Unë nuk jam marrë kurrë me trafiqe dhe krime. Kam qenë dhe jam punëtor e familjar. Kam punuar për të nxjerrë bukën e gojës në Shqipëri e në emigracion dhe emrin e kam ndryshuar si të gjithë shqiptarët, që të më jepej mundësia të rrija atje dhe punoja.
Partia Demokratike po merret me limona dhe me mandarina emigrantësh shqiptarë, të cilët halli i ka shtyrë të punojnë në një vend të huaj! Ata bëjnë sikur nuk e dijnë se çfarë kanë hequr shqiptarët për të mbijetuar me emra e me mbiemra nga më të ndryshmit në Greqi.
Në fakt PD është limoni i shtrydhur që s’i duhet më asnjeriu. Le ta thonë autoritetet fjalën e tyre dhe të na falin qytetarët për këtë shqetësim!
Unë dua të siguroj qytetarët e Vorës se pavarësisht kësaj poshtërsie, jam dhe do të jem në çdo moment në krye të detyrës! Ju më besuat në 30 qershor për t’i ndryshuar faqen Vorës sonë dhe për t’a vënë bashkinë në shërbim të qytetarëve.
(d.xh/Balkanweb)
