Katari ka bërë të ditur se nuk është në dijeni të një “lidhjeje të drejtpërdrejtë” midis armëpushimeve të propozuara për konfliktet në Liban dhe Rripin e Gazës, transmeton Anadolu.
“Unë nuk jam në dijeni të ndonjë lidhjeje të drejtpërdrejtë midis përpjekjeve për të qetësuar situatën në Liban dhe Gaza, por të dy dosjet janë të ndërthurura dhe rrugët e tyre janë paralele”, tha zëdhënësi i Ministrisë së Punëve të Jashtme të Katarit, Majed al-Ansari, në një konferencë për media në Doha.
“Libani po përballet me një luftë të plotë izraelite e jo me një përshkallëzim dhe Katari bën thirrje për ndalimin e luftës tani në Gaza dhe Liban”, shtoi ai.
Al-Mansari tha se vendi i tij do të vazhdojë përpjekjet e tij me partnerët për t’i dhënë fund luftës në Gaza dhe Liban.
Mbrëmë, SHBA-ja, Bashkimi Evropian (BE) dhe nëntë vende të tjera i bënë thirrje Izraelit dhe Hezbollahut të bien dakord për një armëpushim 21-ditor në mes të një përshkallëzimi në luftën e tyre ndërkufitare.
Megjithatë, kryeministri izraelit, Benjamin Netanyahu, mohoi raportet e mediave se ai ishte dakord me armëpushimin e propozuar, duke theksuar se ai urdhëroi ushtrinë e tij të vazhdojë të godasë Libanin me forcë të plotë. Ai gjithashtu tha se lufta izraelite në Gaza do të vazhdojë “derisa të arrihen të gjitha qëllimet e luftës”.
Katari, së bashku me Egjiptin dhe SHBA-në, ka ndërmjetësuar midis Izraelit dhe Hamasit për të arritur një armëpushim dhe një marrëveshje shkëmbimi të të burgosurve në Gaza. Megjithatë, përpjekjet e ndërmjetësimit kanë ngecur për shkak të refuzimit të Netanyahut për t’i dhënë fund luftës në Gaza.
Izraeli ka goditur disa zona në Liban që nga mëngjesi i të hënës në mes të një përshkallëzimi të luftës ndërkufitare me Hezbollahun. Sipas shifrave të Ministrisë së Shëndetësisë, të paktën 610 persona janë vrarë që atëherë dhe mbi 2 mijë të tjerë janë plagosur.
Hezbollahu dhe Izraeli janë përfshirë në një përleshje ndërkufitare që nga fillimi i luftës izraelite në Rripin e Gazës, e cila ka vrarë të paktën 41.500 palestinezë, kryesisht gra dhe fëmijë.
Komuniteti ndërkombëtar ka paralajmëruar kundër sulmeve në Liban, pasi ato ngjallin spektrin e përhapjes së konfliktit të Gazës në rajon.
