Irani ka shkelur kufirin e rezervave me uranium të pasuruar, të përcaktuar me marrëveshjen bërthamore të vitit 2015, konfirmoi Agjencia Ndërkombëtare për Energji Bërthamore (ANEB).


Agjencia tha se inspektorët e saj kanë verifikuar se kufiri prej 300 kilogramësh është tejkaluar. ANEB pritet të dalë me një raport për këtë çështje. Më herët, agjencia shtetërore e lajmeve në Iran, IRNA, citoi ministrin e Jashtëm iranian, Mohammad Javad Zarif, të ketë konfirmuar se limiti është shkelur.


Marrëveshja bërthamore kufizon pasurimin e uraniumit dhe rezervat e Iranit me këtë substancë, ndërsa redukton edhe kapacitetet bërthamore të këtij vendi, në këmbim të lehtësmit të sanksioneve ndërkombëtare kundër tij. Por, Shtetet e Bashkuara e kanë braktisur në mënyrë të njëanshme marrëveshjen, në maj të vitit 2018, dhe i kanë rikthyer sanksionet kundër Iranit.


Zyrtarët iranianë janë ankuar se palët e mbetura në marrëveshje – Britania, Franca, Gjermania, Kina dhe Rusia – nuk kanë arritur t’i zbusin efektet e sanksioneve të SHBA-së mbi ekonominë e Iranit dhe kanë paralajmëruar se Teherani do të tejkalojë nivelin e rezervave me uranium të pasuruar. “Nëse evropianët bëjnë atë që duhet të bëjnë, masat tona janë të kthyeshme”, tha të hënën Zarif.

Uraniumi i pasuruar përdoret për krijimin potencial të armës bërthamore. Vendet evropiane kanë paralajmëruar se çdo shkelje e marrëveshjes do të sillte pasoja.

(Balkanweb)