Aktorja e njohur Angelina Jolie ka folur ne 20-vjetorin e masakrës së Srebrenicës.
Ambasadorja e posaçme e UNHCR-së, ka thënë se s’do ta harrojë kurrë vizitën fabrikës në Potoçare, ku mijëra djem dhe burra boshnjakë u ekzekutuan brutalisht brenda pak ditëve.

“Ai vend i ftohtë, i zbrazët dhe i shkretuar dhe ato mure ku janë rreshtuar histori dhe kujtime individuale, lë ndjenjë të tmerrshme, që ngulitet thellë në eshtrat e çdo vizitori”, ka thënë Jolie.

“Te nënat e Srebrenicës kam gjetur një kundërshti të fuqishme të asaj të keqeje. Në mirësinë e tyre të pakufi, në dinjitetin dhe maturinë me të cilën ruajnë kujtimet për fëmijët e vet. Vendosmëria e tyre për të flakur tutje hakmarrjen dhe urrejtjen është fuqia e cila më ka lënë të pagojë”, ka thënë më tej aktorja e famshme.

Angelina Jolie thekson se dhimbja e atyre që e kanë përjetuar luftën në Bosnje e Hercegovinë s’do të zhduket kurrë.

“Në thelbin e vet ajo bëhet vetëm edhe më e keqe për shkak të atyre që i mohojnë faktet historike. Prandaj ka rëndësi edhe më të madhe që të ndihmojmë të gjithë ne, të cilët jemi miq të Bosnje e Hercegovinës, që kujtimi për Srebrenicën kurrë të mos zbehet”.

Aktorja vizitoi Qendrën Memoriale në Potoçare marsin e shkuar, në cilësinë e ambasadores së UNHCR-së, bashkë me shefin e atëhershëm të diplomacisë britanike Willam Hague.