Ishte një mëngjes i ngrohtënë shtator, kur një grup peshkatarësh hasën në një kanoe prej druri të mbushur me emigrantë të vdekur që lundronte 43 milje nga kryeqyteti i Senegalit, Dakar.

Emigrantët, trupat e të cilëve ishin në një “gjendje të avancuar dekompozimi”, besohet se po bënin udhëtimin prej 1250 milje nga Senegali në Ishujt Kanarie të Spanjës.

Kjo nuk ishte varka e parë ‘fantazmë’ që u zbulua nga peshkatarët, me emigrantë gjithnjë e më shumë të dëshpëruar që grumbullohen në varka druri të prishura që shpesh shpërbëhen ose shkatërrohen përtej Atlantikut, përpara se të arrijnë destinacionin e tyre.

Pavarësisht se i njohin rreziqet, të cilat përfshijnë vdekjen nga uria, dehidratimi dhe mbytja, mijëra emigrantë nga Senegali e përballojnë udhëtimin çdo vit dhe nuk ka asnjë shenjë të uljes së numrave, ndryshe nga shumica e udhëtimeve të tjera të migrimit në Evropë.

Kalimet e emigrantëve përmes Mesdheut perëndimor u ulën me 1 për qind në 9 muajt e parë të vitit, ndërsa në Mesdheun qendror flukset u rritën me 64 për qind.

Por rruga e Afrikës Perëndimore është rritur 100 për qind këtë vit, tregojnë shifrat e Frontex.

Ousmane bëri udhëtimin njëjavor nga Senegali në Ishujt Kanarie me një varkë prej druri, i rrethuar nga trupa të pajetë, nga frika se ai do të vdiste.

“Gratë qajnë, po ashtu edhe burrat, vetëm sepse është e vështirë të jesh në fund të varkës, i rrethuar nga vdekja. Ndonjëherë madje humbisni kujtesën dhe ju errësohen mendimet”, tha Ousmane për The Telegraph.

I riu, i cili nuk zbuloi emrin e vërtetë apo moshën e tij, përfundoi udhëtimin e tij, por bashkëudhëtarët nuk ishin aq me fat.

Numri i të vdekurve përgjatë rrugëtimit ka kaluar më shumë se 800 këtë vit, një rritje prej 76 për qind krahasuar me të njëjtën periudhë të vitit të kaluar. Numri i vërtetë i të vdekurve ka të ngjarë të jetë edhe më i lartë, shprehen autoritetet.

Në disa udhëtime, asnjë nga emigrantët nuk arrin i gjallë në destinacionin e tyre. Të paktën 30 trupa u gjetën në atë varkë në brigjet e Senegalit në shtator, sipas autoriteteve ushtarake.

Duke gjykuar nga gjendja e dekompozuar e kufomave, varka e emigrantëve ka të ngjarë të endej në Oqeanin Atlantik për disa ditë përpara se të gjendej.

Në mënyrë të ngjashme, trupat e 24 emigrantëve nga Afrika Sub-Sahariane u sollën në tokë nga Shërbimi i Shpëtimit Detar i Spanjës në fillim të gushtit. Dy nga ata që vdiqën ishin fëmijë.

Itinerari është bërë një pikë kryesore bisedash në Senegal, Ishujt Kanarie dhe në territorin e Spanjës.

Një emigrant që e bëri udhëtimin me një varkë të vogël peshkimi tha për The Telegraph: “numri i njerëzve që po vdesin – ka mijëra njerëz që humbasin jetën gjatë rrugës. Disa varka nuk arrijnë kurrë në destinacionin e tyre”.

Arsyet janë komplekse, sipas Inhira García Belda, e cila punon si integruese sociale për azilkërkuesit në Tenerife, më i madhi nga ishujt Kanarie të Spanjës.

“Po flasim për mijëra njerëz, disa prej tyre janë në kërkim të një pune më të mirë në Evropë, të tjerët janë azilkërkues që ikin për shkak të regjimit të Macky Sall,” tha ajo.

Varfëria është një faktor kryesor që i largon njerëzit nga Senegali, sipas Douglas Yates, një profesor i asociuar i specializuar në politikën afrikane në Shkollën Amerikane në Paris.

“Një person senegalez ha oriz dhe nëse mundet edhe, pak peshk. Ky është ushqimi i tij”, tha ai për The Telegraph.

Yates theksoi se një pjesë e madhe e emigrantëve senegalezë që bëjnë këtë udhëtim janë të rinj, të cilët janë të prirur të ndikohen nga mediat sociale.

“Të gjithë atje kanë një telefon, kështu që ata shohin botën e pasur dhe shikojnë situatën e tyre. Ata gjithashtu shohin senegalezët, veçanërisht në kryeqytet, duke u pasuruar”, shprehet Yates.

Ai shpjegoi se Macky Sall, i cili ishte president i Senegalit deri në mars të këtij viti, kishte premtuar se do të rilindte ekonominë e vendit, por për shumë njerëz, situata e tyre ekonomike u përkeqësua – veçanërisht pas Covid.

Ishujt Kanarie janë bërë destinacioni i preferuar për migrantët, dhe për rrjedhojë edhe kontrabandistët, sepse shihet si një pikë hyrjeje në Evropë, duke pasur parasysh statusin e Ishujve Kanarie si një komunitet autonom spanjoll.

Por ajo që gjejnë nuk është gjithmonë ajo që presin emigrantët, tha një shtetas senegalez për The Telegraph.

“Udhëtimi ishte aq i rrezikshëm saqë nuk mund të përshkruhet. Deti ishte aq i trazuar sa kapiteni donte të kthehej, por të tjerët donin të vazhdonin, kështu që shpërtheu një sherr”, shpjeguan ata.

Qeveria e Senegalit njoftoi një plan 10-vjeçar në gusht për të trajtuar kalimet e paligjshme dhe rritjen e vdekjeve të emigrantëve.

Fernando Clavijo, president i Ishujve Kanarie, i ka bërë thirrje kryeministrit spanjoll Pedro Sánchez, të bëjë më shumë për të zgjidhur krizën.

“Çdo 45 minuta, një emigrant vdes duke u përpjekur të arrijë në plazhet tona. Kjo do të thotë se mafiet e trafikimit po bëhen gjithnjë e më të fuqishme”, tha ai.

Në fillim të kësaj vere, Sánchez përfundoi një turne në Afrikë, duke njoftuar një plan për të trajtuar imigracionin e paligjshëm në një konferencë shtypi së bashku me Bassirou Diomaye Faye , i cili zëvendësoi Sall në prill të këtij viti.

“Ky rajon ka rëndësinë të madhe strategjike për Spanjën dhe ne duam të kontribuojmë në stabilitetin dhe prosperitetin e saj”, këmbënguli Sánchez.