TIRANE– Pas ankesave të qytetarëve për shërbimet në Zyrat e Regjistrimit të Pasurive të Paluajtshme në disa qarqe të vendit, kanë vijuar edhe masat e para. Ministrja e Drejtësisë, Etilda Gjonaj, në një deklaratë për mediat, tha se janë shkarkuar 8 punonjës të Hipotekave, pasi janë kryer verifikime nisur nga ankesat e qytetarëve.

Ministrja Gjonaj tha se nga grupet e inspektimit u konstatuan probleme në disa Hipoteka të vendit.

“Nga grupet e inspektimit u konstatuan probleme në disa AZRPP. Probleme u konstatuan në Hipotekat në Fier, Elbasan, Shkodër, Tiranë dhe Korçë. U evidentuan zvarritje të procesit, shkelje të ndryshme”, u shpreh ministrja Gjonaj.

DEKLARATA PER MEDIAT
Në mbajtje të premtimit që Qeveria ka bërë në fillim të mandatit të saj, për “Qeverisje në koalicion me njerëzit e zakonshëm”, Ministria e Drejtësisë mbetet e angazhuar maksimalisht për të trajtuar dhe zgjidhur ankesat e qytetarëve.

Vetëm gjatë muajve tetor – dhjetor të vitit që lamë pas, përmes platformës së bashkëqeverisjes “Shqipëria që Duam”, në adresë të Ministrisë së Drejtësisë, qytetarët kanë shkruar dhe adresuar 277 ankesa. Të cilat janë trajtuar në mënyrë serioze nga strukturat teknike të Ministrisë nga vetë unë si Ministre dhe Kabineti im.

Bazuar në ankesat e paraqitura, kam urdhëruar ngritjen e grupeve të posaçme të inspektimit, të cilët gjatë muajve nëntor-dhjetor kanë inspektuar zyrat e hipotekave të Fierit, Shkodrës, Elbasanit, Pogradecit dhe Korcës.

Në përfundim të kontrolleve dhe hetimeve administrative, të kryera nga strukturat e Ministrisë lidhur me ankesat e qytetarëve, janë konstatuar shkelje të ligjit dhe vonesa të tejskajshme dhe të pajustifikuara në trajtimin e disa prej tyre. Për 15 ankesa të zgjidhura vetëm gjatë muajit dhjetor, zvarritjet janë disa vjeçare, në shkelje të hapur me ligjin dhe duke bërë që qytetarët të ndihen të pafuqishëm për të realizuar të drejtën e tyre.

Të vendosur për të goditur shkeljet e ligjit dhe veprimet korruptive, sot kam marrë masat administrative deri në shkarkimin e tyre, për 8 punonjës të zyrave të hipotekave në rrethet: Elbasan, Lushnjë, Fier, Durrës, Tiranë, Pogradec, Korçë dhe Shkodër që kanë pasur në trajtim këto raste.

Dëshiroj t’i siguroj qytetarët, për angazhimin maksimal të timin si Ministre, të Ministrisë së Drejtësisë, për të zgjidhur njëherë e mirë problematikat e tyre në regjistrimin e pronës, të cilat janë identifikuar nga Ministria në bashkëpunim me Zyrën Qëndrore të regjistrimit të Pasurive të Paluajtshme.

Dëshiroj gjithashtu, të inkurajoj të gjithë qytetarët që për çdo problem apo vonesë të pajustifikuar në marrjen e shërbimeve pranë këtyre zyrave apo çdo institucion tjetër ligjzbatues në varësi të Ministrisë së Drejtësisë, të na drejtohen përmes platformës shqiperiaqeduam.al.

Shqipëria që Duam, është një platformë e cila, që prej nisjes së saj, ka marrë fuqinë e përçuesit të zërit të qytetarit, me qëllimin e vetëm për t’i dhënë fund sorrollajeve në dyert e institucioneve shtetërore dhe për të luftuar korrupsionin, i çfarëdo niveli qoftë ai, duke treguar zero tolerancë ndaj abuzuesve dhe shkelësve të ligjit.

(BalkanWeb)