Bashkitë e drejtuara nga partia demokratike i janë drejtuar përmes një shkrese komisionit qëndror të zgjedhjeve, përmes së cilës kërkojnë zbatimin e dekretit të Presidentit për anulimin e zgjedhjeve të 30 qershorit.
Kryebashkiaku i Kavajës, Isa Sakja, në letrën e firmosur për KQZ-në, ministrisë së brendshme si edhe prefekturës Tiranë, kërkon që KZAZ nr 42 të ndërpresë të gjitha veprimet për afishimin e listave të zgjedhësve në të gjitha shkollat të cilat janë në pronësi të Bashkisë Kavajë.
Të njëjtën kërkesë ka dorëzuar pranë KQZ edhe kreu i Bashkisë së Matit Nezir Rizvani, si edhe kreu i Bashkisë në Skrapar, Nesim Spahiu. Lirimin e ambienteve të KZAZ me qëllim zbatimin e dekretit të Presidentit Ilir Meta për anulimin e zgjedhjeve të 30 qershorit e kanë kërkuar edhe kryetarja e Bashkisë në Gjirokastër, Zamira Rami.
Dekreti i Presidentit është zbatuar edhe nga Kryetarja e Bashkisë Shkodër, Voltana Ademi e cila në letrën drejtuar KZAZ-ve në këtë qytet, kërkon prej tyre lirimin e mënjëhershëm të ambjenteve në funksion të procesit zgjedhor.
Të njëjtën gjë ka bërë edhe kreu i Bashkisë Lezhë Fran Frrokaj dhe ai Kamzës Xhelal Mziu.
Reagim i Bashkisë Kamëz
Pas botimit në fletoren zyrtare të dekretit të Presidentit Ilir Meta, për anulimin e zgjedhjeve vendore të 30 qershorit 2019, Bashkia Kamëz nis punën për zbatimin e dekretit të Presidentit.
Përmes një shkrese zyrtare me Nr.3271 prot. Datë 13.6.2019, drejtuar Komisionit Qëndror të Zgjedhjeve, kreu i bashkisë së Kamzës, z.Xhelal Mziu kërkon lirimin e menjëhershëm të ambienteve të KZAZ nr.27, Shkolla “Ibrahim Rugova, Kamëz dhe KZAZ nr.28, Shkolla “Isa Buletini”, Njësia Administrative Paskuqan, Bashkia Kamëz.
Gjithashtu në shkresë kryebashkiaku i Kamzës kërkon nga KQZ, heqjen e listës së zgjedhësve të afishuar në institucionet arsimore parashkollore dhe parauniversitare (çerdhe, kopshte, shkolla), nën administrimin e Bashkisë Kamëz,si dhe në objektet e subjekteve private (nëse janë afishuar). Vlen për t’u theksuar se PD fitoi bashkinë e Kamzës në zgjedhjet e fundit vendore të 2015, me Xhelal Mziun, për drejtimin e Bashkisë Kamëz.
Shembullin e këtyre bashkive e kanë ndjekur edhe bashkitë e juglindjes, Pogradeci dhe Devolli, ku dy kryetarët aktualë Eduart Kapri dhe Bledjon Nallbati i kanë dërguar shkresën KQZ-së.
(BalkanWeb)