TIRANE- Anulohet ministeriali i ministrave të Brendshëm dhe të Drejtësisë të BE-së dhe rajonit, që ishte parashikuar të mbahej në datat 7 dhe 8 dhjetor në Sarajevë të Bosnjë-Hercegovinës.
Shkak për anulimin e Samitit u bënë kushtet atmosferike në aeroportin e Sarajevës.
Shqipëria do të përfaqësohej nga ministri i Brendshëm, Saimir Tahiri, dhe ministri i Drejtësisë, Ylli Manjani. Avioni me të cilin udhëtonte ministri Manjani, ka bërë ulje të detyruar në aeroportin e Vjenës.
Tema e takimit të Ministrave të Brendshëm dhe të Drejtësisë ishin çështje të sigurisë së brendshme dhe të drejtësisë.
Takimi i përbashkët i ministrave të BE-së dhe Ballkanit Perëndimor do të mbahej për herë të dytë, pas propozimit të ministrit Tahiri bërë vitin e kaluar, që të ishin pjesëmarrës dhe ministrat e rajonit.
(el.sp/BalkanWeb)