Një thirrje për ndihmë vjen nga një vajzë e re nga Kosova, e cila vuan nga një sëmundje shumë e rrallë që e kanë 16 persona në të gjithë botën.

Këtë të martë tek “Rudina”, emisioni i pasdites në Klan, ishte e ftuar 25­-vjeçarja, Saranda Hoda nga Gjakova e Kosovës, e cila vuan nga Haemangioma, rritja e pakontrolluar e venave, një sëmundje që e kanë vetëm 16 persona në botë. “Nga 16 persona që e kanë këtë sëmundje unë jam e vetmja që i jam nënshtruar një operacioni,” thotë e reja, e cila ka kaluar një operacion që ka zgjatur 10 orë dhe i ka kushtuar rreth 40 000 euro.

Por, tashmë ajo bën apel për ndihmë që të kryejë edhe dy ndërhyrje të tjera që kushtojnë rreth 55 000 euro. Hoda, punonte si gazetare pranë një televizioni në Gjakovë ndërsa ka qenë pjesë edhe e edicionit “Shpija e Kosovës”. Kjo është një sëmundje që vjen prej lindjes. Është një sëmundje që lind me të,” thotë Saranda.

“Nuk dua që një sëmundje të më mposhtë mua dhe të më pengojë që t’i realizoj ëndrrat e mija,” thotë ajo. Saranda tha se ka bashkëjetuar me sëmundjen deri vitin e kaluar kur kaloi një hemorragji të brendshme që pothuajse i mori jetën. Jam me plagët e hapura akoma, të cilat i pastroj çdo dy ditë. Jam komplet e lidhur me fasha të cilat më pengojnë të eci. Më duhet shumë forcë dhe imunitet për operacionin e radhës,” thotë Saranda, e cila kujton se nuk i ka të hollat që të kryejë operacionin e radhës.

Të gjithë ata që duan të ndihmojnë Sarandën të jetojë mund të gjejnë informacion mbi llogaritë e saj bankare nga faqja në Facebook “Saranda Hoda Sasa ka nevojë për ndihmë”. 25­-vjeçarja nga Gjakova është rritur nga njerka, të cilën ajo e thërret “nënë”.

(m.k/BalkanWeb)

 

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb