ANGLI- “Njerëz në shitje, dy për njëzet funte, të tjerë vijnë nesër” – shkruan një tabelë, në një ofertë të pazakonshme për blerësit në rrugën e famshme të Londrës, Oxford.

Burra e gra me mbishkrime përreth qafave të tyre qëndronin të heshtur derisa shitësi provonte t’i bindte kalimtarët për mallin e tij.

Kjo performancë u organizua nga “Ushtria e Shpëtimit” (The Salvation Army) për të dërguar një porosi të fuqishme – se skllavëria nuk i përket së kaluarës por është edhe në ditët e sotme moderne, madje është problem në rritje.

“Shumë njerëz mendojnë se skllavëria ka përfunduar 200 vjet më parë, dhe njerëzit e mendojnë skllavërinë si diçka që ka të bëjë me zinxhirët, litarët e të ngjashme. Ajo çka ne po shpresojmë të bëjmë me këtë performancë është që të themi se skllavëria në të vërtet sot ka imazh tjetër. Ka të bëjë me shfrytëzimin e njerëzve si mallra dhe që shiten”, tha Keith Turton nga organizata “Ushtria e Shpëtimit”, transmeton Koha.net.

Ndërsa Arianna (redaksia e SkyNews i ka ndryshuar emrin për ta mbrojtur identitetin e saj) e di shumë mirë se çka do të thotë të jesh nën pronësi të dikujt.

E shitur në martesë nga prindërit e saj në Shqipëri kur ishte vetëm 12 vjeçe, ajo u detyrua të punonte si skllave e seksit nga bashkëshorti i saj. Ai e trafikoi atë nëpër Evropë derisa ajo ia doli të ikte në Britani me ndihmën e një të afërmi.

20 vjeçarja i ka thënë “Sky News”: “Ai më tha: ‘Duhet ta bësh këtë, duhesh të flesh me të gjithë këta njerëz për të më sjell para mua”.

“Nuk doja ta bëja… e kush dëshiron? Por, nuk kisha zgjedhje. Më duhet ta bëja sepse në të kundërtën më rrihte. Nuk ndjehesha më si njeri, ndjehesha si kafshë”, ka thënë Arianna.

“Sky News” shkruan se dhuna është një veçori e shpeshtë në skllavërinë moderne që mund të merr edhe formën e shfrytëzimit seksual, robërisë shtëpiake dhe punës së detyruar. Është një biznes global dhe burim i përfitimeve të mëdha për trafikues dhe sindikata të krimit.

(m.k/BalkanWeb)