BERAT – Para 70-vjetësh, kur avioni amerikan me 32 infermiere dhe mjekë u rrëzua në rrethinat e Beratit, jeta e tyre u shpëtua falë banorëve të zonës, që i strehuan, ushqyen dhe mbrojtën për 3 muaj e arritën t’i përcillnin edhe për në Itali.
Sot, pas 70 vjetësh, ambasadori amerikan Arvizu, ka vizituar familjen e njeriut që e shoqëroi personelin mjekësor amerikan, Kostaq Stefën, që për aktin e tij human, u dënua nga regjimi i pasluftës si spiun i amerikanëve. Arvizu takoi vajzat e tij, Eldën dhe Tinën dhe shprehu kënaqësinë e tij që po takohej me to dhe po mësonte për historinë e pasur të asaj familjeje.

“70 vjet më parë, një avion C-53 me 32 veta personel mjekësor të ushtrisë amerikane që udhëtonte për në Itali, u rrëzua në këtë pjesë të Shqipërisë, e cila në atë kohë ishte nën pushtimin nazist, – rrëfejnë burimet e Ambasadës Amerikane në Tiranë. – Për fat të mirë, amerikanët u shpëtuan nga banorët vendas, dhe gjatë qëndrimit të tyre tre-mujor në Shqipëri, deri në shpëtimin dhe transferimin e tyre në Itali, 32 infermiereve dhe mjekëve iu dha strehim dhe ushqim nga individët dhe familjet shqiptare.

Personi i cili i shoqëroi amerikanët gjatë kësaj kohe, z Kostaq Stefa, u ekzekutua nga regjimi mbi dyshimet se ai ishte spiun për amerikanët. Sot, Ambasadori Arvizu dhe Kryetari i Bashkisë Nasufi vizitojnë rezidencën Stefa dhe takohen me Eldën dhe Tinën, vajzat e Z. Kostaq Stefa. “Është një nder për mua të takohem me ju dhe të mësoj më shumë për historinë e pasur të familjes tuaj”, u tha Eldës dhe Tinës Ambasadori Arvizu.

ar.sh/BalkanWeb