Bekim Balaj dhe Amir Rrahmani ishin protagonistët kryesor me golat e tyre në ndeshjen mes RNK Split dhe Rijekës, e përfunduar me rezultatin 1-2. Fillimisht, Mario Gavranoviç gjeti rrugën e rrjetës për miqtë në minutën e 32′ të pjesës së parë.
Pas kalimit në avantazh të Rijekës, Rrahmani barazoi shifrat 1-1 në minutën e 45′ për RNK Split. Pjesa e parë u mbyll në barazim, por ekipi i Balajt u shfaq më kërkues ndaj golit. Sulmuesi i Kombëtares shqiptare të futbollit u aktivizua në pjesën e dytë dhe në minutën e 74′ realizoi golin e avantazhit, duke i dhënë tri pikë mjaft të vlefshme Rijekës në tabelën e klasifikimit të Ligës së Parë kroate (52).
Dy minuta më pas, Balaj ndëshkohet me kartonin e dytë të verdhë, duke lënë fushën e lojës, ndërsa goli i tij përcaktoi edhe fatin e takimit.
Aktualisht, Rijeka ndodhet 2 pikë larg vendit të parë që mbahet nga Dinamo e Zagrebit, ndërsa ekipi i Rrahmanit RNK Split, ndodhet në vendin e katërt me 36 pikë./panoramasport
(ed.me/BalkanWeb)
