Bangladeshi ka ndaluar një grup islamik të akuzuar për vrasjen e aktivistëve që bëjnë fushata në mbështetje të personave LGBT në këtë vend me shumicë myslimane, njoftuan sot burime zyrtare.

Ministria e Punëve të Brendshme nxorri një urdhër që ndalon të gjitha aktivitetet e Ansar al Islam, një grupim që mendohet se është degëzim i Al Kaedës në subkontinentin Indian.

“Aktivitetet e Ansar al Islam kërcënojnë paqen dhe stabilitetin në Bangladesh. Të gjitha aktivitetet e këtij grupi janë ndaluar sepse ato përbëjnë një kërcënim për rendin publik”, thuhet në këtë njoftim zyrtar.

Grupi mbahet përgjegjës për vrasjen vitin e kaluar të aktivistëve LGBT, Xulhaz Mannan dhe mikut të tij në një apartament në Dhaka.

Sipas një grupi amerikan monitorues “SITE Intelligence”, Ansar al Islam akuzohet gjithashtu për vrasjen e dy blogerëve të Bangladeshit, Niladri Chattopadhyay dhe Nazim Uddin Samad.

Ansar al Islam është organizata e shtatë islamike që ndalohet në Bangladesh, që ka një kushtetutë sekulare, por më shumë se 90 për qind e popullsisë janë myslimanë.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: