Grupi i Bankës Botërore ka bërë të ditur se 1.2 miliardë njerëz janë në rrezik të lartë nga ndryshimet klimatike në mbarë botën, transmeton Anadolu.
Në një raport të titulluar “Ngritja ndaj sfidës: Historia e suksesit dhe strategjia për arritjen e përshtatjes klimatike dhe qëndrueshmërisë”, Banka Botërore theksoi se njerëzit përballen me rreziqe që ndryshojnë jetën përmes ekspozimit ndaj të paktën një rreziku kritik klimatik, si valët e të nxehtit, përmbytjet, uraganet dhe thatësira.
Raporti zbuloi se rritja ekonomike dhe ndërtimi i qëndrueshmërisë ndaj ndryshimeve klimatike shkojnë dorë për dore, duke vlerësuar se një rritje prej 10 për qind e prodhimit bruto të brendshëm për frymë banori do të reduktojë numrin e njerëzve që janë më të cenueshëm me rreth 100 milionë.
“Përmirësimi i të ardhurave është e rëndësishme, por vendet gjithashtu duhet të miratojnë një sërë politikash të informuara për klimën për të ndërtuar elasticitetin e njerëzve”, theksohet në raport.
Organizata ndërkombëtare këshilloi se vendet më të pasura duhet t’i japin përparësi përmirësimit të infrastrukturës së tyre ekzistuese, ndërsa vendet me të ardhura më të ulëta kanë një mundësi për ta ndërtuar atë në mënyrë të qëndrueshme që në fillim.
“Realiteti i kthjellët është se çdo vend mund të goditet nga ndryshimet klimatike, por kjo sfidë është më e rënda për vendet më të varfra të botës”, tha Axel van Trotsenburg, drejtor i lartë menaxhues në Bankën Botërore.
Ai tha se kjo është arsyeja pse Grupi i Bankës Botërore po punon për të përgatitur më mirë njerëzit për goditjet klimatike duke dyfishuar përpjekjet për ushqimin dhe bujqësinë, ujin, ekosistemet dhe biodiversitetin, infrastrukturën, rrjetet e sigurisë sociale, zhdukjen e varfërisë, si dhe mjetet e jetesës.
Grupi i Bankës Botërore tha se veprimi i saj klimatik përfshin mbrojtjen e më shumë komuniteteve nga rreziqet klimatike, mbështetjen e vendeve për të zhvilluar sisteme të paralajmërimit të hershëm, përmirësimin e qasjes në sigurime për komunitetet dhe bizneset e kërcënuara nga goditjet klimatike, si dhe krijimin e sistemeve të kujdesit shëndetësor për reagim të shpejtë ndaj krizave
