TIRANE

Sekretari i Partisë Demokratike Gazmend Bardhi në një konferencë për mediat tha se arrestimi i Klevis Balliut është politik, i paligjshëm dhe i paprovuar. Bardhi u shpreh se Rama po përdor policinë ndaj qytetarëve.


“Arrestimi i Klevis Balliut është politik, i paligjshëm dhe i paprovuar. Rama po përdor policinë ndaj qytetarëve. Qelitë po mbushen me të burgosur politikë. Policia ushtron dhunë ç’njerëzore, kur ka për detyrë të ruajë qytetarët. Këta policë, që ulin kokën përballë krimit të organizuar, ushtrojnë dhunë ndaj të pafajshmëve, ndaj grave dhe fëmijëve.



Sot në burg duhet të ishin dhunuesit e qytetarëve dhe ata që kanë firmosur për projektin te Unaza e Re. Por kështu ndodh në një shtet ku Prokuroria është politike dhe merr urdhëra direkt nga Edi Rama. Arrestimi i Balliut nuk do të kishte ndodhur, sikur atë të mos e donte vetë Rama. Kryeministri e do Balliun në burg, sepse nuk do përkushtimin e tij ndaj një kauze të drejtë siç është ajo e banorëve të Unazës së Re, të cilët mbrojnë tokat dhe shtëpitë e tyre”, deklaroi Bardhi.

Gazmend Bardhi theksoi se fundi i Ramës është afër, ndërsa shtoi se bashkë me të, do t’ju vijë fundi të gjithë atyre që i shërbejnë kryeministrit.

Deklarata e Plote:

Pas 28 vitesh të pluralizmit politik, Edi Rama po përdor policinë si mjet dhune ndaj qytetarëve që protestojnë kundër tij dhe si vegël kriminale ndaj kundërshtarëve politikë.

28 vjet pas pluralizmit politik dhe rrëzimit të regjimit diktatorial, Edi Rama ka mbushur qelitë e komisariateve me të burgosur politikë.

Rasti më flagrant është ai i dhunimit çnjerëzor të banorëve tek Unaza e Re, faji i vetëm i të cilëve është se nuk heqin dorë nga mbrojtja e shtëpive të tyre, duke kundërshtuar projektin korruptiv 40 milionë të Edi Ramës.

Pamjet në këtë video të shkurtër tregojnë dhunën e policisë kundër protestuesve paqësorë., duke i goditur, duke i helmuar me gaz.

Pamjet janë revoltuese. Policë të armatosur që ulin kokën para krimit të organizuar, trimërohen para grave dhe fëmijëve dhe bëjnë për spital qytetarë të pafajshëm, duke i djegur ata. Astrit sadikaj dëshmon për djegiet e rënda.

Sot në burg duhet të ishin urdhëruesit e këtyre akteve çnjerëzore. Sot në burg duhet të ishin ata që kanë vënë firmën për projektin korruptiv 40 milionë euro tek Unaza e Re, Edi Rama, Damian Gjiknuri, Afrim Qëndro. Por në një shtet të ndërtuar me vota të blera nga krimi dhe me paratë e pista të korrupsionit qeveritar, në një shtet ku prokuroria është politike dhe urdhërohet nga Edi Rama, mbahen të burgosur politikë qytetarët dhe përfaqësuesit e Partisë Demokratike që dalin në krah të tyre.

Arrestimi i Klevis Balliut është një akt hakmarrjeje politike nga Edi Rama, i cili nuk i fal Klevisit përkushtimin e përditshëm dhe kurajon që u ka dhënë banorëve të Unazës së Re për të mbrojtur të drejtat e tyre.

Arrestimi i Klevis Balliut është politik, i paligjshëm dhe i pabazuar në prova! Nëse prokuroria nuk do të ishte vegël e Edi Ramës, do të kishte urdhëruar që mbrëmë lirimin e menjëhershëm të Klevis Balliut dhe 4 qytetarëve të tjerë.

Ata mbahen padrejtësisht në burg për fajin e vetëm se janë kundërshtarë politikë të Edi Ramës.

Prokuroria politike po shkel ligjin, duke u bërë pjesë e skenarit kriminal që godet opozitën dhe qytetarët, por nuk heton dhe mbyll dosje për korrupsionin e Edi Ramës, mbyll dosjen per Unazen e Re, nuk heton për vjedhjen e zgjedhjeve apo për lidhjen e politikaneve me krimin.

Nuk është e largët dita që çdo shërbëtor i Edi Ramës do të mbajë përgjegjësi para ligjit. Kudo qoftë ai, në polici, prokurori apo gjykatë, fundi i tij do të jetë i njëjtë me atë të Edi Ramës.

(d.xh/ Balkanweb)