TIRANE- Për herë të parë, kreu i Partisë demokratike Lulzim Basha pranoi se përgjegjësia për rezultatin e dobët në zgjedhjet e 25 qershorit duke siguruar 44 mandate, ishte e tija.

I ftuar në ‘Top Story’ Basha tha se përgjegjësia për humbjen e thellë, kryesore i takon kryetarit, ndërsa shtoi se për këtë ka bërë edhe analizë.

“Përgjegjësia kryesore për rezultatin e zgjedhjeve natyrisht i takon kryetarit, më takon mua. Unë e kam bërë këtë proces analizë, sepse nuk mund t’i ikja, edhe gjatë procesit të zgjedhjes për Kryetar të PD. E kam bërë fare të qartë që nëse dikush duhet të analizohej gjatë atij procesi isha unë dhe përgjegjësitë e mia si kryetar. Për pjesën që i takon PD, pra për pjesën objektive brenda nesh, se mos harroni që ne dolëm nga një luftë. I themi zgjedhje, por ishin luftë, me krimin e organizuar të lidhur në aleancë me kundërshtarin politik. Pra, ka dhe një faktor objektiv, por për sa i përket faktorit të brendshëm, padyshim që përgjegjësia kryesore është e kryetarit, është e imja”, tha Basha.
(ed.me/BalkanWeb)