ELBASAN

Kreu i Partisë Demokratike Lulzim Basha iu ka bërë thirrje qytetarëve të Elbasanit të marrin pjesë masivisht në protestën e 16 shkurtit në Tiranë kundër qeverisë “Rama”. Ai tha se Elbasani nuk do lëmoshë, Shqipëria nuk do lëmoshë dhe se njerëzit duan mundësi.


“Jemi në Elbasanin e qytetarisë por jemi po kështu në një qytet, në një zonë ku burrat dhe gratë për dekada me radhë janë rropatur. Më dhemb në shpirt kur ju shoh me lot në sy siç pashë zotërinë para pak minutash që më tha se ka 3 invalidë në shtëpi.
Më dhemb në shpirt kur shoh nënat të cilat e kanë të pamundur të blejnë ushqimet bazë për fëmijët e tyre. Më dhemb kur dëgjoj se 5 mijë të rinj e kanë braktisur qytetin e Elbasanit dhe 10 mijë qarkun. Vetëm vitin e kaluar janë mbyllur 1800 biznese në Elbasan. Kjo ndodh në një qytet i cili është prej vitesh nën thundrën e krimit të organizuar. Kjo ndodh sepse të mirat e këtij vendi nuk po prodhojnë as punësim, as mirëqenie, as drejtësi për njerëzit e thjeshtë por vetëm për një grusht grabitqarësh që kanë marrë peng Elbasanin kanë marrë peng Shqipërinë. Në këtë vend ku njerëzit kanë jetuar me dinjitet, me djersën e tyre të ballit dhe ata më të vuajturit kurrë nuk kanë kërkuar lëmoshë. Elbasani nuk do lëmoshë, Shqipëria nuk do lëmoshë njerëzit duan mundësi.
Sot në Elbasan nuk ka mundësi po nuk qe lala Qazim, po nuk qe i lidhur me lalën Qazim , po nuk qe i lidhur me bandat e sanxhaktarëve po nuk qe i lidhur me kryehajdutin Taulant Balla.
Këtu në Elbasanin e Metalurgjikut, këtu ku ne duhet të kishim zënë mend, Ahmetaj, me Ramën e Ballën kanë ndërtuar një incenerator që sot punon me 30% të kapaciteteve sepse është një aferë e pastër korruptive. Inceneratorin e kanë bërë me lekët e taksave tuaja që nuk i shpenzoni dot ju”, tha Basha.


Ai iu bëri thirrje të gjithëve të bashkohen në protestën e 16 shkurtit në Tiranë.
“Të gjithë shqiptarët e ndershëm duhet ta dinë se as parlamenti, as qeveria nuk janë pronë e pushtetarëve por e sovranit. Ju mund ta çlironi veten duke marrë vetë në duar fatin tuaj. Ndryshimi është në dorën e sovranit dhe bashkimi i madh i shqiptarëve më 16 shkurt në Tiranë është vetë sovrani. në atë bashkim do ta gjejnë veten të gjithë. Do të bashkohen me ne të papunët. Me atë bashkim do të vijnë qindra mijëra fermerë, të tradhtuar nga Edi Rama.
Aty do të jenë kolegët e Dritan Zaganit, kolegët e Emiljano Nuhut, kolegët e 4 oficerëve të vrarë. Më 16 shkurt nuk ka një përballje mes të majtës dhe të djathtës por shumicës dërrmuese të popullit të tradhtuar nga Edi Rama dhe një grushti minjsh që kanë ngrënë të babëzitur, kanë marrë ç’kanë mundur, kanë vjedhur dhe grabitur, një grusht njerëzish që s’ka për t’i mbrojtur askush më 16 shkurt sepse policia është populli”, u shpreh Basha.


Kreu i PD tha se populli do diktojë zgjidhjen politike.
“Ejani të gjithë të bashkuar në Tiranë, më 16 shkurt këtë të shtunë. Do të bëjmë një akt me rëndësi. Një, do të deklarojmë fundit e qeverisë së Edi Ramës, dy, do të diktoni zgjidhjen politike.
Për ne zgjidhja është qeveria tranzitore, zgjedhjet e parakohshme parlamentare dhe një parlament i dalë nga vota e qytetarëve. Ju me bashkimin tuaj do ta ndalni rënien në greminë”, u shpreh ai.

(m.k/BalkanWeb)