VORË

Kryetari i Partisë Demokratike, Lulzim Basha nga Vora, ku ishte në një takim me qytetarët tha se ka lindur një shpresë e madhe tek shqiptarët për të luftuar kundër të keqes, e cila e ka burimin sipas tij tek keqqeverisja e vendit.

Ai listoi edhe disa emra të zgjedhur nga PS-ja për zgjedhjet lokale, që sipas liderit të PD-së, sot ata duhet të ishin marrë si të pandehur për shit-blerje votash.

“Ka lindur një shpresë dhe i ka bashkuar të gjithë shqiptarët në këtë betejë. Ne jemi sot  më afër se kurrë të fitores sonë për një Shqipëri demokratike dhe të vlerave  europiane.   Edi Rama nuk ka asnjë shans t’i detyrojë shqiptarët të pranojnë një tjetër krim elektoral. Shikoni se çka bërë: Pesë kandidatë të njohur publikisht nga listat e tyre janë të pandehur të drejtpërdrejtë të dosjeve hetimore për shitblerjen e votave.

Valbona Sako, e dyshuar dhe sot duhet të ishte e pandehur për vjedhjen e votave me Ymer Lalën në Dibër, njësoj si Agron Malaj, njësoj si Dionis Imeraj, njësoj si Pjerin Ndreu. 4 kandidatë që në fakt duhet të ishin të pandehur.dhe po të kishim drejtësi të pavarur, sot duhet të ishin të dënuar për shitblerjen e votës me krimin në zgjedhjet e Dibrës. Kemi edhe kandidatin e Shijakut, i cili sot duhet të ishte para drejtësisë si një nga njerëzit pjesëmarrës me bandën e Avdylajve, në shitblerjen masive të votave në Durrës. Në vend që këta njerëz të jenë para drejtësisë, Edi Rama do të diktojë përsëri zgjedhje me krimin. Do të diktojë përsëri Artur Bushin e krimit në Krujë e Tërmet Peçin e drogës në Tepelenë, e me dhjetëra të tillë anembanë vendit. Vora, Tirana dhe Shqipëria s’ka për ta pranuar kurrë këtë”- theksoi Basha.

Kryedemokrati theksoi se Zot në këtë vend do të jenë shqiptarët e ndershëm dhe jo hajdutët dhe kriminelët. Ai pohoi se shqiptarët e bashkuar kurrë nuk do ta dorëzojnë lirinë dhe demokracinë.

“Kushtetuta  në preambulën e Kushtetuta thotë se: Zot në këtë vend janë qytetarët dhe jo kriminelët, zot janë qytetarët dhe jo hajdutët. Na duhet një dialog kombëtar për të vendosur jo thjesht largimi i Edi Rama, por përmes një dialogu kombëtar. PD i ka zgjidhjet. Ne jemi të vendosur që do t’u kthejmë dinjitetin fermerëve tanë përmes  subvencioneve me uljen e taksës së karburantit dhe çmimin e energjisë . Ne do të bëjmë të mundur që asnjë bijë apo bir shqiptarët që mos të mbetet pa studiuar.

Ne nuk do të njohim asnjë akt të këtij parlamenti monist dhe për këtë ka një zgjidhje: Largimi i kryeministrit Rama. Ne kurrë nuk kemi kërkuar  pushtet në tavolinë. Atë çfarë kishin në dorë ne e dorëzuam. Edi Rama për pushtetin e tij kriminal po synon ta sakrifikojë dhe ta marrë  çdo gjë me pahir me 30 qershor. Të shtunën të gjithë në Tiranë. Nuk e dorëzojmë demokracinë. Nuk e dorëzojmë lirinë”-tha Basha.

(n.m/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb