KORCE- Kryetari i Partisë Demokratike, Lulzim Basha, nisi dje nga qyteti i Korçës turin e bashkëbisedimit me të rinjtë. Duke i quajtur të rinjtë “zemra e PD-së”, Basha tha se si të tillë ata do të qëndrojnë në pararojë të betejës së 21 qershorit, për t’i kthyer shqiptarëve shpresën, punën dhe dinjitetin.

“Sa herë që dinamika e zemrës e Partisë Demokratike ka ndjekur rrahjet dhe ritmin e zemrës së rinisë, ne kemi dalë fitimtarë”, theksoi Basha.

Kreu i PD-së tha se niveli i papunësisë tek të rinjtë është në shifra alarmante, duke shtuar se vendit i duhet oferta e re e taksave të ulëta, e politikave te zhvillimit dhe e bashkëqeverisjes.

“Ndërsa të rinjtë e mirëarsimuar rendin rrugëve të Shqipërisë të pashpresë për një vend pune, qeveria promovon kriminelët. Plaga e madhe që kemi, 40% e të rinjve të papunë nuk mund të mos jetë prioriteti ynë numër një. Shiko, çfarë rinie të aftë ka Korça! E pse është e nevojshme të merren kontigjente të krimit, si ai i akuzuari për përdhunim e të bëhet punonjës Tatimesh?! Sepse kjo qeveri nuk e njeh meritën, ky është problemi i madh, sepse kjo është një ndër rrënjët e së keqes. Ndalja e së keqes dhe ekuilibrimi i pushteteve janë zgjidhja. Nuk është zgjidhje të largohemi nga Korça, nuk është zgjidhje të largohemi nga Tirana, nuk është zgjidhje të largohemi nga Shqipëria” – u shpreh kryetari i Partisë Demokratike.

Kandidati për kryetar të Bashkisë Korçë, Gjergji Mero ka në prioritetet e tij nxitjen e zhvillimit ekonomik dhe mbështetjen e biznesit. Ai tha se “qindra biznese janë mbyllur në dy vjet, ndërsa në Korçë lartësohej kulla e korrupsionit”.

“Do të mbështes çdo iniciativë private për hapjen e vendeve të punës, për vende pune për të cilat ka nevojë ky qytet dhe nuk ka nevojë për kulla. Në Korçë, gjatë këtyre dy viteve janë mbyllur 2600 biznese të vogla e të mesme. Duke u mbyllur ato, kanë mbetur me mijëra familje të papuna, jo vetëm të bizneseve që janë mbyllur por edhe të të punësuarve aty. Sot po mbyllen e po largohen shumë njerëz të vetëpunësuar”, theksoi Gjergji Mero.

BASHA E MERO BATUTA EDHE PËR FUTBOLLIN
Gjatë takimit me të rinjtë nuk kanë munguar edhe batutat me humor mes të pranishmëve. Kandidatit Gjergji Mero nuk i ndahet zemra nga ekipi i futbollit “Skënderbeu”. Ndërsa i kujton tifozit të Tiranës, kryetarit të PD Lulzim Basha se e fituan sërish kampionatin, e garanton se dhe në 21 qershor do të dalë kampion.

“Në garën e 21 qershorit, kampione do të jetë PD në Korçë dhe Tiranë, me Gjegji Meron dhe Halim Kosovën”, tha Lulzim Basha.

“Ndoshta juve të Tiranës, nuk ju erdhi mirë që e morëm për herë të pestë titullin kampion por prapë u ndamë miqësisht sepse e lamë ndeshjen barazim me Tiranën, se ju kemi miq dhe ju premtojmë se ashtu si dolëm kampionë në futboll do të dalim kampionë edhe në 21 qershor”, u shpreh Mero.

Në përgjigje Basha tha se “Vetëm se në 21 qershor, do dilni kampionë edhe ju, edhe doktor Halimi!”.

(el.sp/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb