Ish-agjenti i FBI-së Charles McGonigal është dënuar me 50 muaj burg, ose ndryshe me 4 vite e 1 muaj burg për ndihmën e një oligarku rus që kërkonte të hiqej nga një listë sanksionesh amerikane.
McGonigal është një nga agjentët më të lartë të FBI-së që është akuzuar ndonjëherë për një krim. 55-vjeçari, akuzohet gjithashtu se ka fshehur 225,000 dollarë në pagesa nga një agjent shqiptar, ndërsa punonte ende për FBI-në.
Veterani prej 22 vitesh në FBI, u deklarua fajtor në gusht për shkeljen e sanksioneve amerikane dhe pastrim parash për Oleg Deripaska, një oligark rus i pasur, i cili ka lidhje të ngushta me presidentin Vladimir Putin.
McGonigal është urdhëruar të dorëzohet tek autoritetet më 26 shkurt 2024. Por, para se të jepej dënimi, McGonigal shprehu pendesë për veprimet e tij, ku tha se “Kam kryer një krim dhe si ish-agjent special i FBI-së më shkakton dhimbje emocionale dhe fizike. Unë qëndroj para jush sot me një ndjenjë të thellë pendimi.”
McGonigal ka ndikuar që oligarku Oleg Deripaska të dalë nga lista e zezë e sanksioneve amerikane. Nga ana tjetër, McGonigal ka pranuar se ka punuar për të futur një rival të Deripaskës, në listën e zezë të SHBA.
Në shkëmbim, Deripaska e paguante McGonigal me 41 mijë dollarë në muaj, ndërsa 51 mijë dollarë i kishte marrë paraprakisht. Prokuroria ka kërkuar 5 vite burg dhe 200 mijë dollarë gjobë për McGonigal.
55-vjeçari e ka pranuar fajin, duke shmangur kështu një gjyq që mund të sillte akuza që do e dënonin deri në 80 vite burg.
McGonigal u takua me Deripaska në Londër dhe Vjenë pasi ai doli në pension dhe e lidhi atë me një firmë ligjore për të ndihmuar në largimin e listës së sanksioneve të SHBA-së, thanë prokurorët. Ai u punësua më vonë nga Deripaska për të hetuar Vladimir Potanin, një oligark rival. McGonigal përdori një nënkontraktor për të gjetur skedarë në lidhje me Potanin në rrjetin e errët dhe po negocionte një shitje prej 3 milionë dollarësh të atyre skedarëve kur FBI-ja sekuestroi telefonin e tij, “duke i dhënë fund në mënyrë efektive skemës” në nëntor 2021, sipas prokurorëve.
McGonigal u deklarua fajtor në rastin e Uashingtonit në shtator, duke pranuar se kishte fshehur kontaktet e tij me zyrtarë të huaj, si dhe qindra mijëra dollarë që ai pranoi nga një ish-punonjës i agjencisë së inteligjencës shqiptare.
(BalkanWeb)
