Kryeministri Edi Rama mori pjesë në takimin e dytë të nivelit të lartë “Shqipëria 2030 në BE – Ruga e Reformave”, ku u theksua rëndësia e procesit të integrimit të Shqipërisë në Bashkimin Evropian.

Gjatë fjalës së tij, Rama vuri në dukje se, sipas një ankete të fundit, Bashkimi Evropian është më popullor se kurrë brenda perimetrit të tij, një ndryshim që pason zhvillimet e fundit politike dhe sociale.

Ai theksoi se ky ndryshim ka ardhur pas një periudhe pasigurie dhe ndërlikimesh që kanë ndikuar në vetëdijen e popujve të BE-së, të cilët tani e kuptojnë më shumë se kurrë se BE është një perimetër sigurie, që garanton lirinë individuale dhe barazinë para ligjit.

Për Shqipërinë, sipas Ramës, qëllimi kryesor i integrimit në BE mbetet heqja e ndikimeve historike dhe siguria e lirisë dhe barazisë për qytetarët shqiptarë, pa pasur ndikuar nga ndryshimet politike në Tiranë.

“Që nga 1983 BE nuk ka qenë më popullor sipas një ankete, brenda perimetrit të vet, se sa është aktualisht.
Është një ndryshim dramatik i këndvështrimit popullor në BE që natyrisht vjen si rezultat i faktit që çka ishte marrë deri para pak kohës si e mirëqenë nuk është më e tillë. Instinktivisht popujt e BE janë vetëdijësuar se BE është edhe një perimetër sigurie brenda të cilit vendet dhe popujt të ndjehen e duan të mbeten të pa kërcënuar në të gjithë atë që kanë arritur dhe mbi të gjitha në lirinë individuale dhe barazinë e tyre para ligjit.

Për ne shqiptarët mbetet e thjeshtë pse-ja e domosdoshmërisë për të qenë anëtarë të BE, që për ne është të jemi përfundimisht të lirë nga hija e historisë tonë dhe të sigurt që liria jonë individuale dhe barazia para ligjit të mos jenë më atribut i lëvizshëm në lidhje me faktin se kush qeveris në Tiranë”, tha ai.