Kreu i grupit parlamentar të Partisë Socialiste, Taulant Balla ka komentuar ndryshimet në qeveri që ndodhën dje, ku në vend të ministres së Arsimit Besa Shahini u emërua deputetja Evis Kushi. I ftuar në rubrikën ‘Opinion’ në ‘News24’ Balla teksa falënderoi Shahnin për kontributin e saj në këtë ministri, theksoi se reformat në arsim do të vijojnë, pasi në krye të saj do të jetë një personazh që është pjesë e botës akademike.
Por teksa u pyet në lidhje me faktin nëse Shahini dha dorëheqjen apo u shkarkua nga kryeministri Edi Rama, Balla u tregua i rezervuar ndërsa shtoi se; “Kryeministri Rama ka ditur gjithmonë që të krijojë një shpirt ekipi brenda ministrave. Unë mendoj se kjo pak rëndësi ka.”.
INTERVISTA
Pse u lagua ministrja e Arsimit, Besa Shahini?
Gjithmonë në çdo qeveri ka ndryshime të drejtuesve të ministrive përkatëse. Unë besoj, e gjej rastin pikë së pari ta falënderoj Besën për një punë të shkëlqyer. Besa për një vit e gjysmë ishte zv/ministre dhe bashkë me Lindita Nikollën bënë një punë të shkëlqyer. Më pas mori ministrinë në një moment të vështirë, siç ishte “Pakti për universitetin”. Ka qenë një moment tejet i rëndësishëm. S’kishte të bënte me largimin e saj, por kam thënë se në ministrinë e Arsimit PS ka bërë një hap dhe një hov kolosal. Garancia që ka sot çdo mësues shqiptar për të qëndruar në pozicionin e vet dhe për të ushtruar profesionin më të vlerësuar, lidhet me një reformë. Ndaj them se largimi i Besës vjen në një moment përmbyllje me sukses të zgjedhjeve në Universitet.
Largimi përkoi në ditën e parë të shkollës. Çfarë mesazhi donte të përcillte kryeministri Rama?
E kam ndjekur me vëmendje këtë vlerësim të shumë personazheve që dalin në ekrane, që shkruajnë nga kolltuku apo dalin nga ekrani i shtëpisë. Një ministër Arsimi përmbyll të gjithë fazën që ka të bëjë me detyrën e tij. Sot fillon një proces i ri. Duke qenë se mbi të gjitha në radhë të parë jam deputet në një zonë të caktuar, ku kam qenë dje në disa shkolla në Elbasan, i gjithë procesi parapërgatitor nën drejtimin e Shahinit u bë në mënyrë të shkëlqyer.
Besa Shahini u shkarkua apo dha dorëheqjen?
Ajo që është e rëndësishme që të themi për publikun është se cikli për reformën në ministrinë e Arsimit do të vazhdojë. Implementimi i reformave do të vijojë me një hov të ri dhe efektiv me ministren e re, zonjën Kushi. Ajo që është më rëndësi është se ne e kaluam testin e djeshëm, atë të ditës së parë të shkollës. Po ndiqja dje në darkë për disa vende fqinje, dhe problematikat e hasura, në vendet si Italia ishin. Duhet të kemi fokusin, dhe zonja Kushi, ka rol të rëndësishëm, për fillimin e vitit të ri akademik. Pasi dhe ai është me rëndësi.
S’ju përgjigjet pyetjes… A mban përgjegjësi kryeministri Rama?
Kryeministri Rama ka ditur gjithmonë që të krijojë një shpirt ekipi brenda ministrave. Unë mendoj se kjo pak rëndësi ka. Besa do të vazhdojë të ruaj një komunikim të përditshëm me Evisin, për të bërë këtë stafetën e domosdoshme për javët në vijim.
Po për ministren e re çfarë kriteresh u përdorën?
Një ministre si zonja Kushi që vjen nga bota akademike, edhe pse deputete se ka ndërprerë komunikimin dhe detyrën për të qenë pedagoge. Ndaj gjej rastin që të vlerësojë për zgjedhjen që ka bërë kryeministri edhe brenda grupit parlamentar. Pasi përmban personalitet të vlerësuara në shumë fusha të jetës.
(BalkanWeb)
