Ka nisur në këto momente seanca për gjykatësin e lartë, Xhezair Zaganjorin ne Kolegjin e Posaçëm të Apelimit, pasi Komisioneri Publik ankimoi vendimin e KPK për konfirmimin në detyrë të Zaganjorit.
Mësohet se sot Komisioneri Publik, Florian Ballhysa vlerësoi se sa i përket shkaqeve të ankimit, nuk rezulton të ketë ndryshuar asnjë rrethanë. Ai vlerëson se të gjitha shkaqet e ankimit duhet të merren në shqyrtim.
Në lidhje me 23 provat e paraqitura nga subjekti i rivlerësimit, KP sqaron se për 4 pasuritë e patundshme në Tiranë, subjekti ka paraqitur deklaratë noteriale të 4 bashkëpronarëve dhe bashkëshortëve të tyre ku deklarohet fakti se 4 çifte kanë kontribuar në ndërtimin e godinës.
Bazuar në këtë deklaratë dhe të ardhurat nga qiraja e “British Counsil” pretendohet se janë paguar tek M.H. në një bankë në Selanik nga 1997 -2003 dhe se detyrimet janë paguar prej saj.
KP shton se, “Zonja M.H. nën tagrat e përfaqësimit ka nënshkruar një kontratë për ndërtimin karabina të godinës në 1996-1997. Pagesa do bëhej me lekë në dorë. Subjekti nuk ka paraqitur dokumentacion për vlerën e godinës, vlerën e paguar, kohën e zgjatjes dhe aftësinë e të ardhurave në atë periudhë.
Lidhur me shkakun e ankimit për pamjaftueshmeri financiare, për KP mbeten të paprovuara të ardhurat e përfituara nga një projekt në Gjermani.
(BalkanWeb)