Demokracia është më e kërcënuar tani se në çdo kohë në tetë dekadat e fundit, tha presidenti amerikan Joe Biden.

“Ne po jetojmë në një kohë kur demokracia është më e rrezikuar në të gjithë botën se në çdo moment që nga fundi i Luftës së Dytë Botërore,” tha ai në qytetin francez të Colleville-sur-Mer.

“Izolacionizmi nuk ishte përgjigja 80 vjet më parë dhe nuk është përgjigja sot”, shtoi ai.

Duke bërë homazhe ndaj SHBA-së dhe ushtarëve të tjerë aleatë që luftuan në plazhet e Normandisë në qershor 1944, Biden theksoi se “aleancat e forta” ishin thelbësore.

“Ajo që aleatët bënë së bashku 80 vjet më parë tejkaloi çdo gjë që ne mund të kishim bërë vetë,” tha ai.

“Ishte një ilustrim i fuqishëm se si aleancat — aleancat e vërteta — na bëjnë më të fortë — një mësim që unë lutem që ne amerikanët të mos e harrojmë kurrë.”

Ai tha se Shtetet e Bashkuara nuk do ta braktisin Ukrainën, e cila ka qenë duke luftuar forcat pushtuese ruse për më shumë se dy vjet.

“Ne nuk do të largohemi sepse nëse e bëjmë Ukraina do të nënshtrohet dhe nuk do të përfundojë me kaq”, tha Biden.

“Fqinjët e Ukrainës do të kërcënohen, e gjithë Evropa do të kërcënohet”, shtoi ai, duke e përshkruar presidentin Vladimir Putin si një “tiran të prirur për dominim”.

“Ka gjëra për të cilat ia vlen të luftosh dhe të vdesësh. Liria ia vlen. Demokracia ia vlen,” tha ai.

Ai vlerësoi NATO-n si “aleancën më të madhe ushtarake në historinë e botës”.

“NATO është më e bashkuar se kurrë dhe edhe më e përgatitur për të ruajtur paqen”, tha ai.

 (A.A/BalkanWeb)