Pardje, më 29 shtator, depërtoi një rreze shprese për të gjithë ne. Mes pritjes plot ankth që na ka përfshirë të gjithëve për gjasat e çeljes së bisedimeve me Bashkimin Evropian dy javë më vonë, mes një vendimi të mençur të opozitës në tokën e askundit që në fillim të tetorit të mos kemi protesta, mes frikës se mos Holanda, Franca ose Danimarka mund të na e bëjnë gjëmën edhe kësaj radhe, befas na erdhi një parashikim optimist. Një kumt tejet i mirë. Rrjeti i lajmeve ekonomike në të gjithë botën “Bloomberg” (shqiptohet “Blumberg”), por edhe rrjet televiziv e radiofonik, me xhiro 9.6 miliardë dollarë në vit, 167 zyra e 20 mijë të punësuar, nuk di të bëjë shaka me lajmin. Që nga viti 1981 kur është krijuar, në këto gati katër dekada, nuk është përfolur asnjëherë për lajme të rreme. Ky rrjet pardje na jep një kumt të mrekullueshëm (https://www.bloomberg.com/neës/articles/2019-09-29/eu-set-to-resume-expansion-push-with-balkan-açession-talks).
Një shkrim i korrespondentit të saj, Nikos Chrysoloras, me titull “BE, e vendosur të rifillojë presionin e zgjerimit me bisedimet e anëtarësimit në Ballkan” dhe nëntituj “Blloku (BE) mund të fillojë negociatat me Shqipërinë, Maqedoninë e Veriut. Drita jeshile mund të jepet në mbledhjen e 15 tetorit të ministrave të BE-së”. Këto po që janë para-lajme! Edhe pse në formën e parashikimeve. Por, tregojnë që diçka brenda Evropës së Bashkuar po lëviz në drejtimin e duhur. Artikullshkruesi e fillon me konsiderata të tilla: “Bashkimi Evropian ka të ngjarë të autorizojë fillimin e negociatave zyrtare të anëtarësimit me Shqipërinë dhe Maqedoninë e Veriut muajin e ardhshëm, duke vënë bast që perspektiva e anëtarësimit në klub do të ndihmojë në ankorimin e mëtejshëm të rajonit të Ballkanit të trazuar drejt Perëndimit”. Sipas shkrimit, shtyrja e çeljes së bisedimeve e qershorit 2019 nga ana e Bashkimit Evropian ishte produkt i zhgënjimit të shteteve kryesore të BE-së nga sjellja e disa shteteve të Evropës Lindore, që iu bashkuan bllokut në vitin 2004 (Polonia, Hungaria e më vonë Rumania) dhe dështimi i tyre i deritanishëm për të mbështetur sundimin e ligjit dhe luftën kundër korrupsionit.
Këto shtete janë dhe ndër përfituesit më të mëdhenj të fondeve strukturore të BE-së dhe ato për ndihmën në bujqësi, kështu zhgënjimi bëhet edhe më i hidhur. Tani, pas vetëm tre muajsh (korrik-shtator), duket se “motori” gjerman është rindezur për ta bindur përfundimisht trojkën (Holandë-Francë-Danimarkë) se “ganxha” mbi Ballkanin duhet forcuar. Duket se mesazhi gjerman përcillet pak a shumë kështu: “Pas emrit magjik (të Veriut) që mori Maqedonia e Veriut dhe arrestimit (në mungesë) të ish-kryeministrit të saj të arratisur, si dhe pas salvaxhentes (kamerdares së shpëtimit) me 9 kushte që i vumë Shqipërisë, që të mos na vijë gjysmë e mbytur në breg, mendojmë se ka ardhur koha të çelim bisedimet!”. Dhe qeveria gjermane di se si të jetë bindëse. Madje, shumë bindëse. Edhe atëherë kur strehoi 1.8 milionë refugjatë sirianë në truallin e vendit të saj dhe detyroi vendet e tjera të BE-së të pranonin 300 mijë të tjerë. Mos vallë po kënaqemi përpara kohe, si qytetarë të këtij vendi me shpresë të vrarë përgjysmë? Mos po ëndërrojmë në diell? Jo! Kemi gjasa reale të marrim më 15 tetor hapjen e bisedimeve për anëtarësim në Bashkimin Evropian.
Pas katër muajsh (shkurt-maj) shumë të vështirë të një beteje të shëmtuar për pushtet të politikës sonë të pafytyrë. Pas sprovës më kobndjellëse (që nga breshëritë e mijëra kallashnikovëve të vitit 1997) që iu servir 2.8 milionë shqiptarëve që banojnë në Shqipëri për të dalë nga rendi kushtetues dhe për të ngjasuar me Libanin e luftës civile 1975-1990. Pas gjithë atij pseudo-rrëmeti nga frika e reformës së mirëfilltë në drejtësi dhe nga etja e pashuar për pushtet, më në fund një dritë në fund të tunelit. Një para-lajm që ka shumë gjasa për t’u bërë vetëm dy javë më vonë lajmi më i mrekullueshëm për ne, qindra mijëra qytetarët e thjeshtë, me pak ose asafare shpresë se vendi ynë do të bëhet. Çelja e bisedimeve me BE-në është seriozisht “eldorado”-ja jonë drejt rrugës së mirëqenies dhe sigurisë se aventura të papërgjegjshme, politikanët tanë nuk do të jenë në gjendje të na luajnë më.
