Kreu i LIBRA-s, Ben Blushi ka inauguruar sot zyrën e kësaj partie në qytetin e Korçës. Me këtë, Blushi i jep fund hapjes së zyrave të partisë LIBRA nëpër rrethe. “LIBRA në Korçë është zyra e fundit që hapim në rrethe por jo nga rëndësia,” u shpreh ish-deputeti i PS-së.
Me hapjen e kësaj zyre, Blushi tha se është “1 alternativë për të ndryshuar Shqipërinë, një mundësi për të qeverisur ndryshe”.
“Kjo zyrë është për të gjithë ata që duan 1 alternativë për të ndryshuar Shqipërinë. Një mundësi për të qeverisur ndryshe Shqipërinë e cila sot vuan nga korrupsioni, kanabisi, krimi dhe vjedhja. Shqipëria është një vend që po vidhet nga qeveritë e veta dhe ne do i japim mundësinë shqiptarëve që të mos vidhen nga ata që zgjidhen për të qeverisur” tha kreu i LIBRAS.
Më herët ditën e sotme, partia e Blushit nisi sot sot zgjedhjet e para të brendshme të saj, duke sjellë padyshim një risi të madhe në mënyrën e të votuarit në vendin tonë, atë elektronik. Më shumë se 8000 anëtarë të regjistruar në këtë forcë politike nga 1 nëntori 2016, mund të përzgjedhin kryetarin dhe bërthamën prej 30 anëtarësh të partisë. Këtë ata mund ta bëjnë elektronikisht, “për cilin të duan dhe si ta gjykojnë ata, duke votuar nga celulari nga shtëpia apo nga zyrat e tyre”.
Këtë e ka njoftuar një ditë më parë edhe kreu i LIBRA-s, Ben Blushi, i cili tha se këto zgjedhje do mbahen për Kryetarin dhe Bërthamën prej 30 anëtarësh, të cilët do e drejtojnë LIBRA-n në zgjedhjet parlamentare të qershorit. Në këto zgjedhje kanë kandiduar më shumë se 100 anëtarë të LIBRA-s.
“Kjo nuk ka ndodhur kurrë dhe ne duhet të jemi krenarë për cilësinë dhe inovacionin e LIBRA-s. Asnjë nga partitë e vjetra nuk zgjedh, nuk voton por vetëm emëron. LIBRA voton dhe zgjedh. Këtë parim ajo nuk do ta shkelë kurrë duke nisur nga nesër”, shkruajti Blushi.
(e.f/BalkanWeb)
