Presidenti i Brazilit Luiz Inacio Lula da Silva ka nderuar Papa Françeskun   dhe ka shpallur një periudhë zie 7-ditore në Brazil.

“Njerëzimi humb sot një zë respekti dhe mirëseardhjeje për të tjerët.  Zoti i ngushëlloftë ata që sot, kudo në botë, vuajnë dhimbjen e kësaj humbjeje të madhe. Në kujtim të tij dhe në nderim të veprës së tij, unë dekretoj një zie shtatëditore në Brazil.”  tha Lula në një deklaratë.

Në mesazh, Lula vlerësoi thjeshtësinë, guximin dhe ndjeshmërinë e tij. Ai  nënvizoi trajektoren e Papës, duke përmendur se Françesku solli çështje të tilla si ndryshimi i klimës në Vatikan dhe kritikoi fuqishëm modelet ekonomike “që e çuan njerëzimin të prodhonte kaq shumë padrejtësi”.

Papa Françesku vdiq këtë të hënë  në Romë, një muaj pasi doli nga spitali, ku u shtrua për të trajtuar pneumoninë e dyfishtë.  Një ditë para vdekjes së tij, ai u shfaq në publik në Vatikan në një meshë të Pashkëve, ku dha urimin e tij të fundit për besimtarët.

(BalkanWeb)