Mbretëria e Bashkuar ka njoftuar se po heq dorë nga sovraniteti i një grupi ishujsh të largët por strategjikisht të rëndësishëm në Oqeanin Indian, pas më shumë se gjysmë shekulli.

Marrëveshja – e arritur pas vitesh negociatash – do të bëjë që Britania e Madhe t’i dorëzojë Ishujt Chagos Mauritius-it në një lëvizje historike.

Këtu përfshihet atoli tropikal i Diego Garcias, i përdorur nga qeveria amerikane si bazë ushtarake për anijet e saj të marinës dhe avionët bombardues me rreze të gjatë.

Njoftimi, i bërë në një deklaratë të përbashkët nga kryeministrat e Mbretërisë së Bashkuar dhe Mauritius, i jep fund dekadave të negociatave shpesh të ashpra midis dy vendeve.

Baza SHBA-MB do të mbetet në Diego Garcia – një faktor kyç që mundëson që marrëveshja të shkojë përpara në një kohë të rivaliteteve gjeopolitike në rritje në rajon midis vendeve perëndimore, Indisë dhe Kinës.

Marrëveshja është ende subjekt i finalizimit të një traktati, por të dyja palët kanë premtuar ta përfundojnë atë sa më shpejt të jetë e mundur.

“Ky është një moment themelor në marrëdhënien tonë dhe një demonstrim i përkushtimit tonë të qëndrueshëm për zgjidhjen paqësore të mosmarrëveshjeve dhe sundimin e ligjit”, thuhet në deklaratën e kryeministrit të Mbretërisë së Bashkuar Keir Starmer dhe kryeministrit të Mauritiusit Pravind Jugnauth.

Udhëheqësit thanë gjithashtu se ishin të përkushtuar “për të siguruar funksionimin afatgjatë, të sigurt dhe efektiv të bazës ekzistuese në Diego Garcia, e cila luan një rol jetik në sigurinë rajonale dhe globale”./BBC/