Deputetit i Partisë Socialiste, Ervin Bushati,ka sulmuar sërish kreun e Partisë Demokratike, në lidhje me skemën e gjobëvënies ndaj bizneseve, që sipas tij, ka përdorur Lulzim Basha.
Bushati përmes një deklarate për mediat ka theksuar se e gjithë opozita është vendosur në shërbim të Bashës, dhe konkretisht për kunatin e tij, Erjon Isufi.
“Prej kohësh brenda Partisë Demokratike thuhet haptas se: e gjithë opozita është vendosur në shërbim të familjes së Lulzim Bashës – konkretisht në shërbim të kunatit, Erjon Isufi. Strategjia që Lulzim Basha përdor është e qartë: “sulmo sipërmarrësit, për të derdhur pastaj para në arkën e kompanisë së kunatit”. Kur i nevojiten më shumë lekë, Luli i sulmon me emër, nga foltorja e PD-së në media.
Sot po ju sjellim një rast konkret.Kompania “Gener 2”, në pronësi të zotit Bashkim Ulaj, u akuzua disa ditë më parë nga Lulzim Basha si e inkriminuar, pasi pritet të ndërtojë rrugën e re “Tiranë-Thumanë- Vorë”.Por e njëjta kompani, në pronësi të të njëjtit individ, vetëm brenda një viti ka paguar plot 220 milionë lekë tek kompania e kunatit të Lulzim Bashës.
Ndoshta për kunatin edhe për Lulin, të cilët deri tani kanë arkëtuar plot 11 milionë euro nga “oligarkët”, 220 milionë lekët e “Gener 2” nuk mjaftojnë, e prandaj hedhin baltë mbi sipërmarrësit për të vendosur gjoba të reja?!Por pyetja për të cilën duhet të përgjigjet sot Lulzim Basha është:
Përse kur zoti Bashkim Ulaj paguan 220 milionë lekë për kunatin e Lulit ai është sipërmarrës i ndershëm; kurse kur kontraktohet nga shteti për të ndërtuar rrugë, duke hapur edhe vende pune, qenkërka i inkriminuar?Rasti i sotëm është vetëm një. Ditë pas dite do t’ju sjellim raste të tjera që vërtetojnë atë që në Partinë Demokratike thuhet hapur, që nga dita që Lulzim Basha na u bë Kryetar!
Luli nuk e ka hallin as tek njerëzit, as te opozita, por te xhepi i tij dhe i kunatit të tij. Prandaj edhe kjo fushatë e fundit e Lulit nuk është asgjë më shumë, se sa gjobëvënia e rradhës ndaj biznesit shqiptar: Për të paguar më shumë para të kompania e kunatit!”, tha Bushati.
(n.m/BalkanWeb)