KRUJE- Përmes një aktiviteti festiv është çelur sezoni turistik veror në Krujë. Në vitin që lamë pas Kruja priti mijëra vizitorë dhe konsiderohet një nga qytetet më të vizitueshme të vendit në çdo stinë të vitit.

Ministrja e Zhvillimit Urban, Eglantina Gjermeni e pranishme gjatë aktivitetit tha se 6 miliardë lekë janë investuar gjatë këtij mandati në këtë qytet teksa përmendi projektet infrastrukturore që po ndërtohen, të cilat do t’i japin Krujës shkëlqimin e merituar.

Me numrin më të madh të vizitorëve për vitin 2016 në plot 300 mijë, Kruja mbetet një nga qytetet më të vizitueshme të Shqipërisë në çdo stinë të vitit.

“6 miliardë lekë janë investuar gjatë këtij mandati në Krujë, në infrastrukturë rrugore si: Rruga e Malit apo rruga e Kalasë, ndërhyrje të kujdesshme në zonën e pazarit pa cënuar origjinalitetin, apo edhe grantet e dhëna për fuqizimin e artizanatit në mënyrë që tradita e prodhimeve artizanale dhe mbi të gjitha autoktone të Krujës të marrë vlerën e duhur. Dy projektet e tjera që po zbatohen janë rikualifikimi i qendrës së Krujës dhe ndërtimi i parkimit nëntokësor si dhe rikualifikimi i sheshit Mustafa Mërlika. Ka edhe më shumë për të bërë. Ashtu siç ulëm TVSH në sektorin e turizmit nga 20% në masën 6%, po ashtu do të vijojmë të punojnë më shumë për Krujën që duam”, tha Gjermeni.

Turizmi mbetet një nga sektorët më të rëndësishëm për vendin dhe sigurisht për qytetin e Krujës mbetet një sektor prioritar për zhvillimin e qytetit dhe të gjithë bashkisë Krujë.

Në mënyrë që turizmi të zhvillohet ka nevojë për infrastrukturën, bujqësinë, produktet artizanale, sigurinë ushqimore, kulinarinë, stimulimin e biznesit nëpërmjet reduktimit të barrës fiskale, restaurimin dhe mbrojtjen e trashëgimisë kulturore dhe monumenteve të kulturës. Në funksion të këtyre nevojave, Qeveria Shqiptare përmes Ministrisë së Zhvillimit Urban po tregon vëmendje maksimale në investimin e projekteve që jo vetëm zhvillojnë qytetin historik por nga ana tjetër ruajnë dhe promovojnë vlerat e tij.

(el.sp/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb