Brenda kësaj jave pritet një transferim i ri i emigrantëve drejt Shqipërisë nga Italia. E katërta. Kësaj radhe pa rrezikun që gjyqtarët në Romë të pengojnë projektin duke mos vërtetuar paraburgimet.
Po, sepse të sjellurit në Gjadër nuk do të jenë më azilkërkues të përgjuar në det, por emigrantë të parregullt, të cilëve komisari i policisë u ka dorëzuar dekretin e dëbimit dhe një gjyqtar ka vërtetuar qëndrimin e tyre në një qendër pritjeje.
Ministria e Brendshme Italiane po punon këto ditë për përzgjedhjen e ‘kandidatëve’ që do të sjellë në Shqipëri. Udhëtimi, me sa dimë, do të bëhet me anije, duke u nisur nga Pulia.
Destinacioni është Qendra e Paraburgimit të Riatdhesimit Gjadër, e cila aktualisht ka rreth dyzet vende, por po punohet për të rritur kapacitetin e saj në 144. Me dekretin e miratuar nga Këshilli i Ministrave më 28 mars, ekzekutivi italian shpreson të dalë nga ngërçi që ka vënë deri më tani dy objektet shqiptare, të inaguruara tetorin e kaluar pas një pune të madhe dhe që prej asaj kohe të ruajtura.
Koha maksimale e ndalimit në këtë lloj qendre është 18 muaj. Kur ekziston mundësia e riatdhesimit të tyre – Tunizia është vendi me të cilin Italia ka marrëveshjen më efektive për riatdhesimet – kjo do të duhet të ndodhë duke filluar nga Italia. Emigrantët e Gjadrit do të kthehen më pas në tokën italiane përpara se të dëbohen.
(BalkanWeb)
