TIRANË
Ish-ministrja e Integrimit Klajda Gjosha shpjegon me fakte çfarë po ndodh me negociatat e Shqipërisë. Me anë të një videoje informuese, Gjosha tregon procedurat që do të ndiqen për Shqipërinë deri më 18 tetor por edhe më pas.
Ndërkaq ajo shrehet e bindur se Shqipëria nuk i çel dot negociatat pa përmbushjen e kushteve të vendosura nga Gjermania dhe se është e ndarë nga Maqedonia e Veriut. Sipas saj, Shqipëria bëhet precedenti i parë për ndryshimin e procedurave për hapin e negociatave.
MESAZHI I PLOTË
Çfarë po ndodh me Negociatat e Shqipërisë?
Komisioni Europian rekomandoi për herë të 3-të në Maj të këtij viti çeljen e negociatave me Shqipërinë pa kushte.
Rekomandim ky pas atij të Tetorit 2016 dhe Prill 2018.
Pas refuzimit të Këshillit në Dhjetor 2017 dhe Qershor 2018, këtë vit duket se Shqipërisë do t’i vendosen 9 kushte deri në marrjen e një date për çeljen e kapitujve të parë.
Në 26 Shtator 2019, Bundestagu Gjerman miratoi një rezolutë për Shqipërinë dhe Maqedoninë e Veriut.
Maqedonia e Veriut pritet të çelë negociatat brenda Janar 2020 pa kushte.
Ndërsa Shqipëria ka marrë një sinjal pozitiv për mbështetjen e çeljes së negociatave por duke e ndarë procesin e vendimmarrjes në 2 faza, të kushtëzuara nga një sërë hapash, që duhet të plotësohen para se të ndodhë formalisht çelja e bisedimeve për anëtarësim.
Deri në konferencën e parë ndërqeveritare, Shqipëria duhet të plotësojë dy kushte:
Të ketë një Gjykatë Kushtetuese dhe Gjykatë të Lartë funksionale;
Të miratojë reformën zgjedhore.
Ndërsa deri në fillimin e kapitujve të parë 23/24, Shqipëria duhet të plotësojë 7 kushte: zbatimi i ligjit për reformën zgjedhore; fillim i procedurave penale kundër gjykatësve dhe prokurorëve, të cilët në procesin e Vetting-ut janë akuzuar për sjellje të dënueshme penalisht; fillimi i procedurave nga prokuroria dhe eventualisht gjyqësori kundër atyre që kanë pasur lidhje me blerjen e votave si dhe ecuri serioze dhe të shpejtë të proceseve; ngritja e strukturës speciale për luftimin e Korrupsionit dhe Krimit të Organizuar dhe vënia në punë e saj; suksese në luftën kundër korrupsionit dhe krimit të organizuar në të gjitha nivelet, përfshirë edhe nisjen përfundimin e proceseve të para gjyqësore kundër zyrtarëve dhe politikanëve të rangut të lartë.” Këtu hyjnë hetime pro-aktive, eventualisht ndjekje dhe dënime penale në lidhje me korrupsionin dhe krimin e organizuar”; përparime të prekshme në reformën administrative, duke përfshirë verifikimin e punësimit të zyrtarëve të lartë dhe drejtorëve, duke mbajtur parasysh edhe kritikat për parregullsi; një vendim përfundimtar për ligjshmërinë e zgjedhjeve lokale të 30 qershorit 2019 nga ana e Gjykatës Kushtetuese. Nëse vendoset mbajta e zgjedhjeve të reja lokale, ato duhet të bëhen mbi bazën e ligjit të ri zgjedhor.
Çfarë do të thotë kjo?
Shqipëria nuk i çel dot negociatat pa përmbushjen e këtyre kushteve.
Shqipëria bëhet precedenti i parë për ndryshimin e procedurave për hapin e negociatave.
Kjo do të prekë në të ardhmen edhe vendet e tjera si Kosovën dhe Bosnjën.
Shqipëria tashmë është de juro dhe de facto e ndarë nga Maqedonia e Veriut.
Çfarë presim në Mbledhjen e Këshillit Europian në 15 Tetor?
Varianti më pozitiv është që vendet të pranojnë opsionin me kushte të Gjermanisë
Në mënyrë që të merret ky vendim, vendet anëtarë duhet të votojnë në unanimitet
Edhe një Veto e vetme do ta rrëzonte vendimin për Shqipërinë.
Çfarë duhet të bëj Shqipëria?
Duhet të plotësojë kushtet pa humbur kohë
Duhet të nisë urgjentisht dialogun politik mes palëve
Qeveria ka përgjegjësi të drejtpërdrejt për plotësimin e kushteve dhe zgjidhjen e krizës
Qeveria duhet të implementojë në mënyrë të menjëhershme strategjinë kombëtare të anëtarësimit
Shqipëria nuk mund të jetë mëshirë për Europën, por një vlerë e shtuar!
(BalkanWeb)
